Гомельскі аблвыканкам адсправаздачыўся аб поўным аднаўленні энергазабеспячэння ў рэгіёне

13 жніўня, Позірк. У Гомельскай вобласці адноўлена энергазабеспячэнне пасля ліпеньскага ўрагану, вынікае з паведамлення ў афіцыйным тэлеграм-канале аблвыканкама.

“Увечары 12 жніўня, у 19.00 да сеткі быў падключаны апошні пашкоджаны стыхіяй участак. Сістэма электразабеспячэння адноўлена поўнасцю. Энергетыкі справіліся з апярэджаннем графіка (даводзілася задача аднавіць да 15 жніўня)”, — гаворыцца ў рэлізе па выніках пасяджэння штаба аблвыканкама.

Удакладняецца, што застаецца адрамантаваць 309 сельскагаспадарчых аб’ектаў.

Непагадзь 13 і 14 ліпеня ў Беларусі прывяла да маштабных пашкоджанняў у сістэме электраперадачы, парушэнняў водазабеспячэння, разбурэнняў. Найбольш ад ураганнага ветру пацярпела Гомельская вобласць, дзе ўводзілі рэжым надзвычайнай сітуацыі.

У тыя дні з-за непагадзі загінула сем чалавек.

Рэакцыя ўладаў аказалася запозненай. Аляксандр Лукашэнка, які крытыкаваў чыноўнікаў і адначасова пераносіў некалькі разоў тэрміны ўстаранення наступстваў, скардзіўся на безыніцыятыўнасць насельніцтва ў пераадоленні наступстваў урагану і патрабаваў прыцягнуць да работ зняволеных, у тым ліку палітычных.

Распараджэнне, якое дазваляе прыцягваць грамадзян да ліквідацыі наступстваў урагану, ён падпісаў 23 ліпеня.

Удзел у ліквідацыі наступстваў урагану ў Гомельскай вобласці прынялі “272 асобы з ліку спецкантынгенту”, паведаміў 25 ліпеня першы намеснік начальніка Дэпартамента выканання пакаранняў МУС Іван Мысліцкі.

Пра тое, што праца дзяржаўнай сістэмы папярэджання і рэагавання на надзвычайныя сітуацыі “патрабуе ўдасканалення”, заявіў намеснік прэм’ер-міністра Анатоль Сівак 1 жніўня. У гэты дзень адбылося паседжанне Камісіі па надзвычайных сітуацыях пры ўрадзе.