КПЧ ААН прызнаў віну Беларусі па справах 13 грамадзян

15 жніўня, Позірк. Камітэт ААН па правах чалавека (КПЧ) прызнаў урад Беларусі “вінаватым у парушэнні права” 13 беларускіх грамадзян на “свабоду выказвання меркавання і мірны сход”, паведамляе праваабарончы цэнтр “Вясна”.

Рашэнне было прынята 17 ліпеня. 

Праваабаронцы называюць толькі адно імя з 13 — актывіста з Барысава (Мінская вобласць) Аляксандра Абрамовіча.

Гаворка ідзе пра парушэнні пры прыцягненні да адказнасці ў Беларусі ў перыяд з 2016 да 2020 года за “ўдзел або публічныя заклікі да ўдзелу ў несанкцыянаваных мірных акцыях пратэсту”. Тых, хто падаў скаргі, аштрафавалі і арыштавалі тэрмінам ад 5 да 10 сутак.

Па выніках разгляду паведамленняў камітэт адзначыў, што ўжо неаднаразова раней устанаўліваў парушэнне Беларуссю правоў, прадугледжаных арт. 19 і 21 Міжнароднага пакта аб грамадзянскіх і палітычных правах.

КПЧ пастанавіў, што беларуская дзяржава “павінна прадставіць аўтарам скаргаў эфектыўныя сродкі прававой абароны ў выглядзе поўнай кампенсацыі — пакрыць кошт выплачаных штрафаў, судовых выдаткаў”.

Акрамя гэтага, Беларусь павінна прыняць “усе неабходныя меры” для прадухілення падобных парушэнняў у будучыні. З гэтай мэтай КПЧ рэкамендуе перагледзець нацыянальную нарматыўную базу, каб правы, замацаваныя ў арт.19 і 21 пакта, маглі быць у поўнай меры рэалізаваныя.

Адначасова камітэт адзначыў, што хацеў бы атрымаць ад Беларусі на працягу 180 дзён інфармацыю аб мерах, прынятых для рэалізацыі рашэння камітэта.

У 2023 і 2024 годзе КПЧ прыняў некалькі падобных рашэнняў.

24 ліпеня камітэт прызнаў урад Беларусі “вінаватым у парушэнні права” шасці беларускіх грамадзян на “свабоду выказвання меркавання і мірны сход”

У красавіку КПЧ ААН прызнаў парушэнне правоў беларусаў Сямёна Беражнога і Ігара Гершанкова (“чорныя рыэлтары”) — праз шэсць гадоў пасля іх пакарання смерцю.

У красавіку 2023 года Камітэт ААН па правах чалавека прызнаў Беларусь вінаватай у парушэнні права журналістаў Таццяны Смоткінай, Дзмітрыя Лупача, Тамары Шчапёткінай і Ларысы Шчыраковай на збор і распаўсюд інфармацыі.

На працягу паўгода ад вынясення рашэння Беларусь павінна была, але не прыняла меры для кампенсацыі прызначаных журналістам штрафаў і іншых судовых выдаткаў. Таксама Беларусі было прапанавана перагледзець закон аб СМІ.

Восенню 2022 года Аляксандр Лукашэнка падпісаў закон аб дэнансацыі факультатыўнага пратакола да Міжнароднага пакта аб грамадзянскіх і палітычных правах, чым пазбавіў беларускіх грамадзян магчымасці звяртацца ў КПЧ ААН з новымі скаргамі аб парушэнні правоў.