Украінскае аб’яднанне “За дэмакратычную Беларусь” заклікала краіны Захаду разарваць сувязі з “рэжымам лукашэнкі”
25 жніўня, Позірк. Разарваць з “рэжымам лукашэнкі” “дыпламатычныя, эканамічныя і іншыя сувязі” заклікала Украіну і яе краіны-саюзніцы міжфракцыйнае аб’яднанне “За дэмакратычную Беларусь” у Вярхоўнай радзе.
Заява зробленая з нагоды 33-й гадавіны надання статусу канстытуцыйнага закона Дэкларацыі аб дзяржаўным суверэнітэце БССР (прынятая 27 ліпеня 1990 года). Яго тэкст апублікаваў у сваім тэлеграм-канале кіраўнік аб’яднання дэпутат Аляксей Ганчарэнка.
“Позірк” публікуе заяву ў перакладзе з украінскай мовы і з захаваннем арфаграфіі аўтараў.
Міжфракцыйная дэпутацкая група таксама заклікала дэмакратычныя краіны “накіраваць свае намаганні на падтрымку беларускіх добраахвотнікаў і дэмакратычных сіл”.
“Аб’яднанне “За дэмакратычную Беларусь” паслядоўна адстойвае пазіцыю прызнання тэрыторыі Беларусі акупаванай расійскай федэрацыяй”, — гаворыцца ў заяве.
“33 гады таму, 25 жніўня 1991 года, была абвешчаная незалежнасць Рэспублікі Беларусь. Гэтая новая старонка ў гісторыі краіны дала надзею на светлую будучыню і эканамічнае развіццё. Але ўжо праз пяць гадоў, у выніку двух рэферэндумаў, у беларусаў адабралі Дзень незалежнасці, бел-чырвона-белы сцяг і паступова забіралі іх незалежнасць. Замест гэтага ім навязалі штучна створаныя дзяржаўныя сімвалы і пастараліся пераканаць у тым, што будучыня Беларусі — з расіяй, сціраючы любыя прыкметы нацыянальнай ідэнтычнасці і знішчаючы гістарычную памяць”, — заяўляюць прадстаўнікі дэпутацкай групы.
Праз 33 гады, паводле іх слоў, Беларусь “знаходзіцца пад кіраваннем таталітарнага рэжыму самаабвешчанага прэзідэнта аляксандра лукашэнкі, а краіна фактычна знаходзіцца пад расійскай акупацыяй”.
“Краіна знаходзіцца ў міжнароднай ізаляцыі, а яе грамадзяне або былі вымушаныя пакінуць сваю Айчыну, або жывуць пад пастаяннай пагрозай быць рэпрэсаванымі і арыштаванымі. Выкарыстанне бел-чырвона-белага сцяга, які калісьці быў сімвалам незалежнасці і свабоды, цяпер прыраўноўваецца да экстрэмізму і тэрарызму, а “Дзень незалежнасці” святкуюць 3 ліпеня, у дзень вызвалення Мінска”, — адзначаюць парламентарыі.
Сённяшняя незалежнасць Беларусі, паводле іх сцвярджэння, “вырашаецца на полі бою ва Украіне, а яе гаранты — беларусы, якія ваююць супраць расійскіх захопнікаў у складзе палка [імя] Кастуся Каліноўскага і іншых фарміраванняў Сіл абароны Украіны і адстойваюць не толькі свабоду Украіны, а і будучыню Беларусі”.
“Спадзяемся, што аднойчы барацьба за свабоду, якая працягваецца, прывядзе да сапраўднай незалежнасці Беларусі, а над Мінскам будзе лунаць бел-чырвона-белы сцяг”, — гаворыцца ў заяве.
МФА “За дэмакратычную Беларусь” было створана 30 чэрвеня 2020 года, паводле слоў Ганчарэнкі, для таго, каб “дапамагчы беларусам стварыць дэмакратычную, свабодную і сапраўды незалежную дзяржаву”. “Мы зробім усё магчымае, каб інфармаваць міжнародныя арганізацыі аб сітуацыі ў Беларусі, дапамагаць беларускім палітычным зняволеным і звычайным людзям выйсці на волю”, — адзначыў тады дэпутат.