Абвінавачанне запытала для экс-намесніка міністра энергетыкі Міхадзюка 6 гадоў пазбаўлення волі
30 жніўня, Позірк. Дзяржабвінаваўца 29 жніўня запытаў для экс-намесніка міністра энергетыкі Міхаіла Міхадзюка пакаранне ў выглядзе шасці гадоў пазбаўлення волі ў калоніі ва ўмовах узмоцненага рэжыму, паведамляюць дзяржСМІ.
Пракурор прапанаваў прызнаць Міхадзюка вінаватым на падставе ч. 3 арт. 430 КК (атрыманне хабару). Яму можа быць назначаны штраф у памеры тысячы базавых велічынь (40 тыс. рублёў) і пазбаўленне права займаць пасады, звязаныя з выкананнем арганізацыйна-распарадчых і адміністрацыйна-гаспадарчых абавязкаў, тэрмінам на пяць гадоў.
Разам з тым, з абвінавачання выключаны ўсе эпізоды атрымання хабару на тэрыторыі Сербіі ў перыяд з 29 снежня 2018 года па 14 студзеня 2019 года.
У сувязі з аб’яўленай у бягучым годзе амністыяй дзяржабвінаваўца прапанаваў вызваліць Міхадзюка ад пакарання часткова тэрмінам на 1 год у выглядзе пазбаўлення волі.
Абставінамі, якія змякчаюць адказнасць, у судзе названы “чыстасардэчнае раскаянне, актыўнае садзейнічанне выяўленню злачынстваў, яўка з пакаяннем, кампенсацыя даходу, атрыманага злачынным шляхам, у тым ліку ўнясенне на разліковы рахунак РНПЦ дзіцячай анкалогіі, гематалогіі і імуналогіі дабрачыннага ўзносу”.
Прыгавор будзе абвешчаны 5 верасня.
Паводле агучанага раней абвінавачвання, Міхадзюк прыняў ад прадстаўніка кампаніі RIKO незаконную грашовую ўзнагароду ў асабліва буйным памеры. Хабар на агульную суму 35 тысяч еўра браў у два этапы: у верасні 2022 года і снежні 2023 года.
Працэс над экс-чыноўнікам пачаўся 20 жніўня ў судзе Ленінскага раёна Мінска. Абвінавачаны сваю віну прызнаў.
28 снежня 2023 года ўрад вызваліў 68-гадовага Міхадзюка, які курыраваў будаўніцтва Беларускай АЭС, ад пасады намесніка міністра энергетыкі “ў сувязі з выхадам у адстаўку”.
Паводле інфармацыі дзяржаўных СМІ, 26 студзеня Следчы камітэт узбудзіў супраць экс-чыноўніка крымінальную справу “за спрыяльнае вырашэнне пытанняў па выбары замежнай кампаніі ў якасці падрадчыка для будаўніцтва і мадэрнізацыі высакавольтных падстанцый у Беларусі”.
14 чэрвеня гэтага года на нарадзе Аляксандра Лукашэнкі з кіраўніцтвам Рады міністраў стала вядома, што Міхадзюк знаходзіцца ў следчым ізалятары. Тады ж стала вядома аб узбуджэнні ў студзені крымінальнай справы.
Паводле слоў Лукашэнкі, у межах крымінальных спраў за хабар прыцягнута 30 чалавек. Ён згадаў справу свайго былога памочніка — інспектара па Віцебскай вобласці, экс-міністра сельскай гаспадаркі і харчавання Ігара Брылы; першага намесніка кіраўніка спраў прэзідэнта Дзмітрыя Рыбко (ахарактарызаваў такім чынам: “Хабарнік — кляйма ставіць няма дзе”).