У Светлагорскім раёне загінуў 53-гадовы пілот мотадэльтаплана
Фрагменты мотадэльтаплана пасля падзення
30 жніўня, Позірк. Пра гібель у Светлагорскім раёне (Гомельская вобласць) 53-гадовага мотадэльтапланерыста паведаміла 30 жніўня прэс-служба Следчага камітэта.
Трагічны выпадак здарыўся непадалёк ад аграгарадка Чыркавічы ўвечары 29 жніўня. Паводле інфармацыі следства, жыхар Светлагорска папрасіў знаёмага з Гомеля пратэставаць яго мотадэльтаплан.
Неўзабаве пасля ўзлёту лятучы апарат пацярпеў крушэнне. Пілот “атрымаў траўмы і быў шпіталізаваны, уначы ён памёр”.
27 жніўня 2023 года СК паведамляў пра падзенне мотадэльтаплана ў Вілейскім раёне (Мінская вобласць), у выніку чаго загінулі мужчыны, што ляцелі на ім (24 і 54 гады).
