30 жніўня, Позірк. У жніўні дзесяць найменняў выдадзеных у Беларусі кніг вынята з продажу праз інтэрнет ва Украіне па выніках маніторынгу Дзяржаўнага камітэта тэлебачання і радыёвяшчання.
Паводле інфармацыі ведамства, факты “незаконнага размяшчэння” кніжнай прадукцыі былі выяўленыя на гандлёвай пляцоўцы prom.ua і створаных на яе платформе старонках дзевяці ўкраінскіх інтэрнэт-крам (“Диаша”, “Фантазери”, “Учбові книги та не тільки”, “Ларчік”, “Mixomarket”, “Православні книги — поштою”, “Навчалка”, “Буквоїд”, comicss.ua).
“Знойдзеныя Дзяржкамтэлерадыё недазволеныя да распаўсюду таварныя пазіцыі выдаленыя з адпаведных інфармацыйных рэсурсаў, а суб’ектам электроннай камерцыі накіравана папярэджанне пра недапушчальнасць ажыццяўлення дзейнасці па выдавецкай справе з парушэннем патрабаванняў ўкраінскага заканадаўства”, — гаворыцца ў паведамленні рэгуляторнага органа.
Адзначаецца, што з красавіка гэтага года “дзякуючы наладжанай супрацы Дзяржкамтэлерадыё з адміністрацыяй маркетплэйсу prom.ua” спынены распаўсюд больш як 3,2 тыс. найменняў выдавецкай прадукцыі “дзяржавы-агрэсара” (гаворка пра Расію) і Беларусі.
У чэрвені 2023 года Уладзімір Зяленскі падпісаў закон “Аб унясенні змен у некаторыя законы Украіны аб усталяванні абмежаванняў на ўвоз і распаўсюд выдавецкай прадукцыі, якая тычыцца дзяржавы-агрэсара, Рэспублікі Беларусь, часова акупаванай тэрыторыі Украіны”. Яго палажэнні былі імплементаваныя ў арт. 281закона “Аб выдавецкай справе”, на якую спасылаецца Дзяржкамтэлерадыё.
