В.а. кіраўніка Партыі БНФ Саранчукоў завочна асуджаны на 4 гады пазбаўлення волі

31 жніўня, Позірк. Выконваючы абавязкі старшыні Партыі БНФ Вадзім Саранчукоў прыгавораны да 4 гадоў пазбаўлення волі, таксама яму прызначаны штраф у памеры 600 базавых велічынь (24 тыс. рублёў).

Пра гэта палітык паведаміў на сваёй старонцы ў “Інстаграме”. Цяпер ён знаходзіцца за межамі Беларусі.

“Асобную падзяку” Саранчукоў выказаў “цуда-адвакату Гушчыну Раману Іванавічу”, які яго віну ў судзе “прызнаў у поўным аб’ёме”.

“Не маю, за што выбачацца ці саромецца. Лічу, што ўсё раблю слушна”, — напісаў в.а. кіраўніка партыі.

Пра пачатак спецвытворчасці ў дачыненні да Саранчукова і былога намесніка кіраўніка моладзевай арганізацыі “Малады Фронт” Аляксандра Кіркевіча Следчы камітэт паведаміў 29 сакавіка.

Ім інкрымінаваліся ч. 1 і ч. 2 арт. 361⁴ Крымінальнага кодэкса (садзейнічанне экстрэмісцкай дзейнасці; тое ж дзеянне, здзейсненае паўторна).

Саранчукоў — грамадскі і палітычны дзеяч з Гродна. Раней займаў пасаду старшыні Гродзенскай гарадской арганізацыі Партыі БНФ, з красавіка 2022 года в.а. старшыні партыі. Дзейны партыйны лідар Рыгор Кастусёў пасля трох гадоў у няволі вызвалены 3 ліпеня гэтага года па амністыі.

Кіркевіч — журналіст, палітычны актывіст, экс-палітвязень. Быў асуджаны за ўдзел у пратэстах у Мінску пасля прэзідэнцкіх выбараў 19 снежня 2010 года, але пасля памілаваны паводле ўказа Аляксандра Лукашэнкі.

Крымінальная спецвытворчасць узбуджалася ў агульнай складанасці ў дачыненні да 118 чалавек. Гэты механізм прымяняецца супраць абвінавачанага, які знаходзіцца за межамі Беларусі і ўхіляецца ад яўкі ў орган, які вядзе крымінальны працэс. Магчымы па 34 складах злачынстваў, якія пераважна адносяцца да катэгорыі цяжкіх і асабліва цяжкіх. Сярод іншага гэта акт тэрарызму, генацыд, найміцтва, здрада дзяржаве, дыверсія, стварэнне экстрэмісцкага фарміравання альбо ўдзел у ім, масавыя беспарадкі, заклікі да санкцый і інш.