Украіна працягвае выходзіць з міжнародных дамоваў з Беларуссю

3 верасня, Позірк. Аб намеры Украіны выйсці з міжнародных пагадненняў з Беларуссю ў рамках СНД паведаміў 3 верасня пастаянны прадстаўнік урада ў Вярхоўнай Радзе Тарас Мельнічук.

Законапраект, які ўхваліз Кабінет міністраў, прапануе “ажыццявіць выхад” з шэрагу міжнародных дагавораў, “заключаных урадам Украіны ў рамках СНД”.

Размова ідзе аб дагаворах супрацоўніцтва ў галіне вывучэння, разведкі і выкарыстання мінеральна-сыравінных рэсурсаў; аб узаемным заліку да агульнага працоўнага стажу і выслугу гадоў службы ў органах і ўстановах пракуратуры ў дзяржавах садружнасці; аб мерах па папярэджанні і спыненні выкарыстання ілжывых таварных знакаў і геаграфічных указанняў; аб парадку перадачы ўзораў наркатычных сродкаў, псіхатропных рэчываў і іх прэкурсораў.

Акрамя таго, адзначыў Мельнічук, прапануецца “дэнансаваць пагадненне аб агульных умовах і механізме падтрымкі развіцця вытворчай кааперацыі прадпрыемстваў і галін СНД”.

Пасля пачатку поўнамаштабнай вайны ва Украіне, у якой Беларусь падтрымлівае Расію, Кіеў скасаваў з Мінскам і ў рамках СНД шмат двухбаковых дагавораў аб супрацоўніцтве.

У прыватнасці, у красавіку стала вядома, што Украіна выйшла з пагаднення з дзяржавамі — удзельніцамі СНД аб супрацоўніцтве ў галіне аховы здароўя насельніцтва, заключанага 26 чэрвеня 1992 года ў Мінску, а таксама з пагаднення аб супрацоўніцтве ў галіне дзяржаўнага выпрабавання і аховы сартоў раслін.

22 снежня 2023 года Вярхоўная Рада Украіны ўхваліла законапраект аб спыненні дзеяння міжурадавага пагаднення з Беларуссю аб свабодным гандлі.

29 лістапада таго ж года Беларусь заявіла аб спыненні дзеяння пагаднення аб узаемным пераводзе і выплаце пенсій (Украіна дэнансавала гэта пагадненне за паўгода да гэтага — 29 траўня).

19 верасня 2023 года абедзве палаты беларускага парламента прынялі, а Аляксандр Лукашэнка падпісаў закон “Аб прыпыненні дзеяння пагаднення паміж Рэспублікай Беларусь і Украінай аб рэгуляванні працэсу перасялення і абароне правоў перасяленцаў і членаў іх сем’яў”. Дакумент быў падрыхтаваны “ў рамках мер у адказ на недружалюбныя дзеянні Украіны ў дачыненні да Рэспублікі Беларусь”, яго рэалізацыя нібыта “будзе садзейнічаць абароне нацыянальных інтарэсаў” Беларусі.

Сёлета 2 жніўня Мельнічук паведаміў пра выхад Украіны з міжурадавага пагаднення з Беларуссю аб супрацоўніцтве ў галіне ўрадавай сувязі.