Літва накіравала Беларусі ноту ў сувязі з бяспекай БелАЭС, Лукашэнка ў адказ заявіў, што “месца ва ўнітазах хапае”

3 лістапада, Позірк. Літва накіравала ў Міністэрства замежных спраў Беларусі ноту з заклікам да “неадкладнага вырашэння пытанняў экалагічнай, ядзернай і радыяцыйнай бяспекі на беларускай АЭС у адпаведнасці з міжнароднымі патрабаваннямі і стандартамі”.

“Беларусь працягвае ігнараваць заклікі міжнароднай супольнасці вырашыць у першую чаргу ўсе праблемы бяспекі ў гэтым небяспечным ядзерным праекце”, — гаворыцца ў заяве літоўскага знешнепалітычнага ведамства.

“Небяспечная АЭС у Астраўцы”, на думку літоўскага боку, уяўляе “вялікую пагрозу для ўсёй Еўропы”.

“Літва настойвае на прыпыненні працы першага і другога энэргаблокаў БелАЭС, пакуль не будуць развязаныя ўсе пытанні бяспекі”, — адзначае літоўскае МЗС.

Аляксандр Лукашэнка адрэагаваў на ноту 3 лістапада падчас рабочай паездкі ў Астравецкі раён (Гродзенская вобласць).

“Гэта шалёныя даслалі ноту. Народ Літвы ніякага дачынення да гэтых шалёных не мае. Паверце, я ведаю, што там адбываецца. Там вярхушка жыве сама па сабе. Ведаю нават дзядуляў і бацькоў тых, хто сёння кіруе Літвой”, — цытуе Лукашэнку яго прэс-служба.

Паводле яго слоў, літоўскіх спецыялістаў “у свой час” запрашалі ў Беларусь для “супрацоўніцтва без каменя за пазухай”, але Вільнюс “па камандзе пэўных людзей з-за акіяна” не прыняў прапанову.

“Гэта ўжо не першая нота. Хай шлюць. У нас месца ва ўнітазах хапае”, — сказаў Лукашэнка.

Падчас паездкі ў Астравецкі раён, адказваючы на іншае пытанне, Лукашэнка заявіў, што Беларусь адновіць адносіны з Літвой і Польшчай. “Яны нікуды не падзенуцца”, — перакананы ён.

“Асноўны прынцып — суседзі не могуць жыць дрэнна <…>. Бываюць рознагалоссі, сваркі і гэтак далей — гэта мінучы час. Прыйдуць часы, калі мы будзем жыць з імі так, як гэта было заўсёды, і ў савецкія часы”, — удакладніў Лукашэнка.

1 лістапада ўведзены ў прамысловую эксплуатацыю другі энергаблок БелАЭС. Адпаведны акт прыёмкі падпісала камісія пад старшынствам намесніка прэм’ер-міністра Пятра Пархомчыка.

Першы блок АЭС сілкуе энергасістэму з 3 лістапада 2020 года, прамыслова эксплуатуецца з чэрвеня 2021-га.

Беларуская АЭС узведзена паблізу Астраўца (Гродзенская вобласць) пераважна за кошт крэдыту Расіі па расійскім праекце ВВЭР-1200. Генеральным праекціроўшчыкам і генпадрадчыкам выступае інжынірынгавая кампанія “АСЭ”, якая з’яўляецца галаўной арганізацыяй інжынірынгавага дывізіёна расійскай дзяржкарпарацыі”Расатам”.