Кіраўнік МЗС Рыжанкоў прадставіць Еўропу на саміце ініцыятывы “Пояс і Шлях” у Ганконгу

9 верасня, Позірк. Візіт міністра замежных спраў Максіма Рыжанкова ў Ганконг анансаваў 9 верасня неафіцыйны тэлеграм-канал знешнепалітычнага ведамства “Глас МИДа” (“Голас МЗС”).

Як адзначаецца, міністр 10-12 верасня возьме ўдзел у 9-м саміце ініцыятывы “Пояс і Шлях”.

“Рыжанкоў выступіць у якасці спікера ад Еўропы”, — падкрэсліваецца ў рэлізе.

Плануецца абмеркаваць шэраг “актуальных пытанняў і шляхоў далейшага ўмацавання дзелавога ўсебаковага ўзаемадзеяння краін у рамках ініцыятывы”.

Чакаецца ўдзел “высокапастаўленых дзяржаўных асоб, кіраўнікоў найбуйнейшых гандлёвых, лагістычных, інвестыцыйных кампаній, банкаў, фінансавых інстытутаў”.

У паведамленні ўказваецца, што ў 2023 годзе Еўропу прадстаўляў кіраўнік МЗС Венгрыі Петар Сіярта.

Кітайскі інфраструктурны праект “Адзін пояс — адзін шлях” (“Пояс і Шлях”) стартаваў у 2013 годзе. Праект накіраваны на развіццё гандлёвых адносін КНР з краінамі Еўропы, Цэнтральнай Азіі і Афрыкі. Цяпер у ім у той ці іншай ступені ўдзельнічае больш за 60 дзяржаў.

Пекін і Мінск будуць “паглыбляць будаўніцтва транспартнай інфраструктуры” і супрацоўніцтва ў сферы аўтамабільных перавозак паміж Кітаем і Еўропай, а таксама “сумесна падтрымліваць бяспеку і бесперабойнасць міжнароднага лагістычнага ланцужка паставак”, гаворыцца ў сумеснай заяве ўрадаў дзвюх дзяржаў, апублікаванай МЗС КНР па выніках першага дня візіту ў Беларусь прэм’ера Дзяржсавета Лі Цяна (22-23 жніўня).

Бакі, як паведамлялася, дамовіліся ўмацоўваць супрацоўніцтва ў галіне грузавых чыгуначных перавозак “па кірунку Кітай — Еўропа”, “стварыць механізм супрацоўніцтва ў гэтай сферы паміж урадамі дзвюх краін, садзейнічаць развіццю інфраструктурных сувязяў, сумесна забяспечваць бяспеку транспартных калідораў”.

Таксама гаворался аб прыхільнасці дзяржаў “паглыбленню ўсебаковага супрацоўніцтва ў рамках ініцыятывы “Пояс і Шлях”.

22 чэрвеня міністр замежных спраў Польшчы Радаслаў Сікорскі заявіў, што “ў сувязі з дзеяннямі Беларусі” на мяжы Варшава разглядае магчымасць закрыцця пунктаў пропуску паміж дзвюма краінамі. 3 ліпеня ў эфіры ён даў зразумець, што пытанне закрыцця пасажырскага руху не абмяркоўваецца.

26 чэрвеня прэзідэнт Польшчы Анджэй Дуда па выніках праведзенай у Пекіне сустрэчы са старшынёй КНР Сі Цзіньпінам адзначыў, што “гібрыдная атака” на беларуска-польскай мяжы стала перашкодай для рэалізацыі кітайскай ініцыятывы “Пояс і Шлях”. Днём раней МЗС Кітая заявіў, што разлічвае на паважлівыя ўзаемаадносіны Польшчы і Беларусі і вырашэнне праблемы на мяжы “шляхам кансультацый”.

18 ліпеня Рыжанкоў, каментуючы ў эфіры тэлеканала АНТ магчымае спыненне транзіту тавараў праз беларуска-польскую мяжу, выказаў меркаванне, што “шантаж з нагоды транзіту кітайскіх тавараў” праз мяжу ля Варшавы “не атрымаўся ад слова зусім, як бы яны там ні харахорыліся”.