Еўрапарламентарый Жалімас: Чаму мы не ставім пад сумнеў імунітэт Лукашэнкі?
Дайнюс Жалімас
13 верасня, Позірк. Розныя справаздачы і высновы міжнародных і няўрадавых арганізацый сведчаць аб “шматлікіх актах рэпрэсій супраць беларусаў”, заявіў дэпутат Еўрапейскага парламента Дайнюс Жалімас 13 верасня ў Вільнюсе на канферэнцыі “Прыцягненне да адказнасці за злачынствы і парушэнні правоў чалавека ў Беларусі”.
Форум арганізаваны Цэнтрам права і дэмакратыі Justice Hub і офісам Жалімаса ў рамках праекта “Умацаванне шляху да правасуддзя для ахвяр злачынстваў рэжыму”.
Еўрапарламентарый канстатаваў, што імёны пацярпелых ад дзеянняў рэжыму Аляксандра Лукашэнкі вядомыя. “Пагатоў, нам ужо вядомая большасць выканаўцаў і тое, хто адказны за арганізацыю ўсіх масавых рэпрэсій, — сказаў ён. — Мы нават ведаем, што гэтыя рэпрэсіі юрыдычна кваліфікуюцца як злачынствы супраць чалавечнасці, у прыватнасці катаванні, незаконнае пазбаўленне волі і пераслед з палітычных матываў”.
Жалімас нагадаў, што прыняты шэраг рэзалюцый (“у тым ліку не менш за 11 рэзалюцый Еўрапарламента”), якія “заклікаюць да дзеянняў па забеспячэнні адказнасці за злачынствы супраць ахвяр рэжыму Лукашэнкі”.
“Некаторыя з іх настойваюць на ўжыванні ўніверсальнай юрысдыкцыі і эфектыўных санкцый, — адзначыў ён. — Аднак мне здаецца, што рэальнасць далёкая ад гэтых заклікаў у палітычных рэзалюцыях”.
“Наколькі надзейна гучыць абавязацельства забяспечыць адказнасць рэжыму Лукашэнкі, калі ў нас дагэтуль няма ніводнай падазраванай асобы і асобы ў вышуку за злачынствы супраць чалавечнасці? Чаму мы не адважваемся паставіць пад сумнеў імунітэт Лукашэнкі на падставе незаконнага захопу ўлады? Ці не варта гучней казаць пра адмысловы суд або трыбунал для Лукашэнкі ці пра тое, наколькі мэтанакіраваныя і эфектыўныя санкцыі супраць лукашэнкаўскага рэжыму?” — сказаў Жалімас.
“Далейшае прамаруджванне ў забеспячэнні правасуддзя прывядзе да пагаршэння сітуацыі, напрыклад да страты даверу ахвяр да міжнароднага правасуддзя… Нашая бяздзейнасць толькі заахвочвае дыктатара”, — лічыць еўрапарламентарый.