26 верасня, Позірк. У пункце пропуску Брэст мытнікі выявілі 19 каралеўскіх пітонаў “незвычайнай афарбоўкі”, якія былі схаваныя ў аўтобусе, што рухаўся з Польшчы, паведамляе прэс-служба Дзяржаўнага мытнага камітэта (ДМК).
Паводле інфармацыі ведамства, кіроўца аўтобуса схаваў рэптылій у адмыслова абсталяванай схованцы ў прыступках. Мытнікам ён паведаміў, што перавозіць толькі асабістыя рэчы. У яго словах усумніліся, транспарт адправілі на дадатковую праверку.
“Сканаграма, атрыманая з выкарыстаннем інспекцыйна-надгляднага комплексу, паказвала на нехарактэрныя даўкладанні ў паражніны аўтобуса, — гаворыцца ў паведамленні. — Адкруціўшы самарэзы на панэлі прыступкі, мытнікі вынялі з нішы пяць пластыкавых кантэйнераў з пітонамі. Разам з жывёламі пад прыступкай кіроўца схаваў і шэсць манометраў вагой 40 кг”.
Пасля таго, як схованку знайшлі, кіроўца прызнаўся, што “тавары незнаёмы чалавек у Варшаве папрасіў яго незаконна перамясціць праз мяжу і перадаць нейкай асобе ў Мінску, кантактаў якой” ён “нечаму не мае”, адзначае ДМК.
У дачыненні да мужчыны распачаты адміністрацыйны працэс паводле ч. 2 арт. 15.1 КаАП (перамяшчэнне тавараў, якія падлягаюць мытнаму дэклараванню, праз мытную мяжу Еўразійскага эканамічнага саюза з утойваннем ад мытнага кантролю, гэта значыць з выкарыстаннем схованак або іншых спосабаў, якія абцяжарваюць іх выяўленне, або з наданнем адным таварам віду іншых тавараў, а таксама спроба такога перамяшчэння).
Аўтобус і ўсё знойдзенае ў схованцы канфіскаваныя.
Паводле інфармацыі ДМК, рэптылій перадалі Мінскаму заапарку.
