Пасля праверак не аднавіла дзейнасць траціна прыватных пансіянатаў — Мінпрацы

26 верасня, Позірк. 11 з 35 прыватных пансіянатаў не прайшлі праверку Міністэрства працы і сацабароны, якая працягваецца з 2022 года, паведаміла на прэс-канферэнцыі 26 верасня намеснік міністра Марына Арцёменка.

Яны зачыненыя альбо прыпынілі сваю дзейнасць самастойна ці паводле рашэння суда на падставе прадпісанняў афіцыйных органаў.

Да 1 кастрычніка ўсе прыватныя пансіянаты павінны атрымаць ліцэнзію на ажыццяўленне дзейнасці, растлумачыла Арцёменка. Закон аб ліцэнзаванні быў прыняты ў снежні мінулага года, норма ў адносінах да пансіянатаў набыла моц з 1 ліпеня.

Паводле Арцёменкі, у Мінпрацы і мясцовыя органы ўлады “рэгулярна паступалі звароты грамадзян”, сваякі якіх знаходзіліся ў пансіянатах прыватнай формы ўласнасці, у якіх сцвярджалася аб невыкананні норм бяспекі, санітарных правілаў, і якасці аказання сацыяльных паслуг.

Была праведзена “інвентарызацыя” пансіянатаў, спецыялісты ўбачылі “сур’ёзныя парушэнні”, сказала Арцёменка.

У прыватнасці, у пансіянаце ў Мінскім раёне з 25, якія пражываюць у 14, была знойдзена кароста, удакладніла яна.

“Адзначу, што шэраг сур’ёзных парушэнняў тычыўся пытаннем бяспекі: незахаванне элементарных патрабаванняў да эвакуацыі, адсутнасць эвакуацыйных выхадаў, пражыванне цяжкіх ляжачых хворых у сутарэнных памяшканнях і ў цокальных паверхах, куды спусціцца нават здароваму чалавеку вельмі цяжка, размяшчэнне хворых людзей на адлегласці выцягнутай рукі”, — растлумачыла прадстаўнік ведамства.

“Невыкананне санітарных правілаў — гэта і пратэрмінаваныя прадукты харчавання, і неналежнае іх захоўванне, адсутнасць санітарных кніжак у кухонных работнікаў. Пра якасць сацыяльных паслуг можна ўвогуле прамаўчаць. Усе гэтыя нормы таксама не выконваліся”, — сказала Арцёменка.

Раней улады правялі праверкі прыватных дзіцячых садоў і школ, пасля якіх частка з іх была зачынена.