Сергяенка з трыбуны азіяцкага форуму АСЕАН асудзіў “аднабаковыя прымусовыя меры”

20 кастрычніка, Позірк. Беларусь імкнецца развіваць “збалансаваныя канструктыўныя адносіны з партнёрамі ў розных рэгіёнах свету, кіруючыся прынцыпамі міралюбнасці, роўнасці і ўзаемнай павагі”, заявіў старшыня Палаты прадстаўнікоў Ігар Сергяенка 20 кастрычніка ў В’енцьяне (Лаос) падчас дыялогу з дэлегацыямі парламентаў краін — удзельніц Міжпарламенцкай асамблеі Асацыяцыі дзяржаў Паўднёва-Усходняй Азіі (АСЕАН).

Дыялог называўся “Парламенцкае супрацоўніцтва на шляху да інтэграцыі і інклюзіўнага росту”.

Як паведамляе прэс-служба ніжняй палаты беларускага парламента, у сваім выступе Сергяенка назваў Беларусь “краінай, здольнай генераваць і рэалізоўваць ініцыятывы, якія аб’ядноўваюць”.

“На чале вугла знешняй палітыкі Беларусі — эканамічная дыпламатыя. У яе аснове — адкрытая эканоміка, спрашчэнне працэдур гандлю, імкненне выбудаваць узаемавыгадную мадэль супрацоўніцтва з усімі дзяржавамі”, — сказаў спікер ПП НС.

Паводле яго слоў, Беларусь з’яўляецца “дзяжавай, якая дынамічна развіваецца, з адкрытай экспартаарыентаванай эканомікай, развітой прамысловасцю, сектарам паслуг і сельскай гаспадаркай”.

Мінск, дадаў Сергяенка, “падтрымлівае ідэю развіцця цеснага ўзаемадзеяння паміж ЕАЭС і АСЕАН у мэтах аб’яднання намаганняў па рэагаванні на новыя выклікі ў розных сферах, уключаючы гандаль, транспарт, лічбавую эканоміку”.

“Беларусь гатовая прапанаваць краінам АСЕАН супрацоўніцтва па самым шырокім спектры напрамкаў. Сярод іх — інфармацыйна-камунікацыйныя тэхналогіі, “разумны горад”, электра- і беспілотны транспарт”, — заявіў старшыня Палаты прадстаўнікоў.

“Ва ўмовах нестабільнасці глабальных рынкаў, кліматычных змяненняў і росту насельніцтва ў рэгіёне АСЕАН важнае значэнне для забеспячэння інклюзіўнага росту мае тэма харчовай бяспекі. Беларусь гатовая да доўгатэрміновага супрацоўніцтва з партнёрамі з Паўднёва-Усходняй Азіі ў харчовай сферы”, — адзначыў ён.

Частка выступу Сергяенка ў Лаосе прыводзяць дзяржСМІ.

“Усе краіны знаходзяцца на розным узроўні развіцця, маюць свае асаблівасці, і гэтую разнастайнасць варта паважаць. Новы баланс інтарэсаў абавязаны прынесці гарантыі бяспекі кожнаму і свабоду ад умяшання ва ўнутраныя справы дзяржаў. Свет павінен стаць свабодным ад аднабаковых прымусовых мер, якія сёння прымаюцца асобнымі краінамі проста па праве моцнага”, — цытуе прадстаўніка ПП НС дзяржвыданне “СБ. Беларусь сёння”.

19 кастрычніка, выступаючы ў Вьенц’яне на першым пленарным пасяджэнні 45-га генеральнага сходу Міжпарламенцкай асамблеі АСЕАН, Сергяенка асудзіў “усё большую напружанасць і канфрантацыю, знешні ціск і ўмяшанне в ўнутраныя справы суверэнных краін”.

АСЕАН з’яўляецца палітычным і эканамічным аб’яднаннем, у якое ўваходзіць 10 краін Паўднёва-Усходняй Азіі — Бруней, В’етнам, Інданезія, Камбоджа, Лаос, Малайзія, М’янма, Сінгапур, Таіланд і Філіпіны.

Дзяржавы гэтага рэгіёну Мінск адносіць да краін “далёкай дугі”, супрацоўніцтва з якімі рэжым Лукашэнкі актывізаваў на фоне пагаршэння стасункаў з Захадам. У чэрвені 2023 года акадэмічны дырэктар даследчага цэнтра BEROC, доктар эканамічных навук Леў Львоўскі заявіў у інтэрв’ю “Позірку”, што спробы беларускай улады знайсці гандлёвых партнёраў у такіх краінах марныя і носяць фактычна “фармальны характар”.

Дэмакратычныя краіны ўвялі ў дачыненні да Беларусі мноства санкцый. Абмежавальныя меры ўводзіліся за фальсіфікацыю прэзідэнцкіх выбараў у 2020 годзе і жорсткае падаўленне распачатых пасля іх пратэстаў, прымусовую пасадку самалёта Ryanair, штучна створаны міграцыйны крызіс на мяжы з краінамі ЕС, дапамогу Расіі ў ваеннай агрэсіі супраць Украіны.