Трэба больш актыўна прадаваць пустыя дамы ў сельскай мясцовасці, лічыць Лукашэнка

16 лістапада, Позірк. Сёння “многія хочуць мець свой дом у вёсцы”, у той жа час у Беларусі застаецца “немала пустых дамоў” у сельскай мясцовасці, заявіў Аляксандр Лукашэнка 16 лістапада ў Клімавічах (Магілёўская вобласць) на абласным свяце “Дажынкі”.

Паводле яго інфармацыі, больш за 1.000 такіх дамоў ужо прадалі, у тым ліку 650 — за 1 базавую велічыню (цяпер — 40 рублёў). У рэестры фігуруе яшчэ 22 тыс. прапаноў, паведаміў спікер.

“Актыўна працягвайце гэтую працу без валакіты і бюракратызму, — цытуе Лукашэнку яго прэс-служба. — Нішто не замінае сёння набыць сорак сотак [зямлі] і стары дом. Не падабаецца — руйнуй. Падабаецца — адрамантуй. Няхай будзе. Даглядай гэтыя сорак сотак, хто яго ведае, як жыццё складзецца. Мы ж беларусы, усё можа быць”.

“І гэты кавалак зямлі вас заўсёды будзе ратаваць. Будзе ўсё добра, як зараз, і дзякуй богу. Унукі, дзеткі прыедуць. Працэс пайшоў, але вельмі марудна. Хутчэй да нас нашыя суседзі прыязджаюць. Шануюць нашу бяспеку, спакой і набываюць гэтыя жмуткі зямлі”, — дадаў ён.

На думку Лукашэнкі, сельгаспрадпрыемствы, прыцягваючы да сябе адмыслоўцаў, павінны выдзяляць ім арэнднае жыллё, якое ім трэба дазволіць выкупіць “гадоў праз 20”.

Акрамя таго, лічыць ён, “неабходна падцягнуць да самага высокага ўзроўню дарогі, транспартнае забеспячэнне, крамы, фельчарска-акушэрскія пункты”. “У бліжэйшыя два-тры гады мы створым прывабную інфраструктуру вольнага часу”, — сцвярджае спікер.

Лукашэнка наведвае “Дажынкі” ў розных рэгіёнах краіны з пачатку кастрычніка. Падчас гэтых паездак, паводле слоў спікера, ён “уважліва вывучаў”, як “падвысіць прывабнасць вёскі”.

“Каб чалавек ведаў: жыць у сельскай мясцовасці добра, выгадна і перспектыўна. А ўвогуле, я вам скажу па-чалавечы, па-сялянску: ніхто нас нідзе не чакае. Там, дзе нарадзіўся, там і спатрэбіўся. Гэта ж не я прыдумаў. Давайце будзе ісці гэтым шляхам”, — заявіў ён, дадаўшы, што “лепш на палях працаваць на трактары, чым ваяваць”.

Фестывалі-кірмашы “Дажынкі-2024” Лукашэнка наведвае гэтай восенню рэгулярна. Паводле меркавання шэрагу экспертаў, гэтыя паездкі ў раёны носяць перадвыбарчы характар. Лукашэнка гэта адмаўляе.