Сілавікі перад выбарамі адпрацавалі затрыманне ўдзельнікаў пратэстаў, зноў палілі аўто
20 лістапада, Позірк. Падчас чарговага этапу камандна-штабных вучэнняў пад кіраўніцтвам міністра ўнутраных спраў Івана Кубракова сілавікі адпрацавалі сцэнары “ўскладнення аператыўнай абстаноўкі падчас электаральнай кампаніі”, паведаміла прэс-служба МУС.
У прыватнасці, гаворка ідзе пра “блакаванне праезнай часткі, групавых парушэннях грамадскага парадку, затрыманні ўдзельнікаў несанкцыянаваных мерапрыемстваў, а таксама злачынцаў, якія захапілі транспарт экстраных службаў”.
“Сёння адпрацавалі эпізоды, якія адбываліся ў рэспубліцы ў 2020 годзе, а таксама тыя, што мелі месца ў іншых краінах. Бо ў нас пачыналася ўсё з банальнага — чэргаў на выбарчыя ўчасткі”, — цытуе Кубракова прэс-служба ведамства.
Паводле яго сцвярджэння, чэргі “штучна ствараліся, каб сабраць людзей і потым вывесці іх на цэнтральныя вуліцы, перакрываць дарогі”.
Міністр заявіў, што чатыры гады таму пратэстоўцы нібыта “спрабавалі завалодаць зброяй, закідвалі бутэлькамі з гаручай сумессю нашы падраздзяленні”.
Напярэдадні сілавікі адпрацоўвалі “алгарытмы спынення парушэнняў заканадаўства на ўчастку для галасавання”, правяралася гатоўнасць супрацоўнікаў міліцыі і прадстаўнікоў дзяржорганаў да дзеянняў пры ўзнікненні няштатных сітуацый, у тым ліку “замахаў на сябраў выбарчых камісій”.
19 лістапада Кубракоў паведаміў, што трэніроўкі праходзяць па ўсёй краіне, “уступныя былі распрацаваны зыходзячы з магчымых горшых варыянтаў развіцця падзей”, у ведамстве “прааналізавалі і зрабілі высновы з падзей 2020 года”.
Паводле яго слоў, “асноўная мэта — выявіць і прыняць меры ў дачыненні да кожнага экстрэміста, які замахваецца на правапарадак і бяспеку”.
Вучэнні з удзелам “суб’ектаў дзяржаўнай сістэмы рэагавання” праводзяцца 19-22 лістапада.
14 лютага, перад “адзіным днём галасавання” 25 лютага, прайшлі “тактыка-спецыяльныя заняткі падраздзяленняў органаў унутраных спраў Мінскага гарнізона па нясенні службы на выбарчых участках”. Падчас манеўраў выкарыстоўвалася спецтэхніка, сярод рэквізітаў, як і цяпер, былі падпаленыя аўтамабілі.
Працэс падрыхтоўкі да сёмых прэзідэнцкіх выбараў, прызначаных на 26 студзеня 2025 года, праходзіць пад поўным кантролем уладаў, палітычнае поле краіны зачышчана ад актыўных апанентаў Аляксандра Лукашэнкі. Прадстаўнікі беларускіх дэмакратычных сіл за мяжой называюць тое, што адбываецца, “спецаперацыяй па ўтрыманні ўлады”, праваабаронцы падкрэсліваюць імітацыю канкурэнцыі.
Папярэднія прэзідэнцкія выбары 9 жніўня 2020 года адзначыліся празмернай жорсткасцю сілавікоў у дачыненні да тых, хто пратэставаў супраць фальсіфікацый. Гэта выклікала яшчэ большы народны ўздым, на які ўлады адказалі маштабнымі рэпрэсіямі, што працягваюцца дагэтуль.
