22 лістапада, Позірк. Беларусь пры неабходнасці можа выкарыстоўваць метады інфармацыйна-псіхалагічнай спецыяльнай аперацыі (ІПСА), таму што “інакш і немагчыма супрацьстаяць у цяперашняй інфармацыйнай вайне”, заявіў Аляксандр Лукашэнка 22 лістапада падчас размовы з выкладчыкамі і студэнтамі ў Мінскім дзяржаўным лінгвістычным універсітэце (МДЛУ).
“Гэта не наша выдумка, — цытуе спікера яго прэс-служба. — Мы вымушаныя будзем рэагаваць. Але ў аснове мусіць ляжаць праўда”.
На яго думку, журналісты адыгрываюць “асаблівую ролю” ў сітуацыі, калі “маецца небяспека развязвання сапраўднай, гарачай вайны”.
“Роля сродкаў масавай інфармацыі сёння вялікая. Вы на пярэднім краі”, — падкрэсліў Лукашэнка, дадаўшы, што давяраць можна толькі дзяржаўным СМІ.
На яго думку, “бачыць іншыя, альтэрнатыўныя пункты гледжання” могуць толькі тыя, хто “ўмее аналізаваць і рабіць адпаведныя высновы”.
Лукашэнка заявіў, што не бачыць нічога дрэннага ў прапагандзе. “Усе журналісты, усе палітыкі — гэта прапаганда, контрпрапаганда і агітацыя. Яны ўсё займаюцца. Некаторыя з-за мяжы сёння кажуць: “Ды ну, гэта прапагандыст!” А ты хто? Мы прапагандуем свой лад жыцця, сваю культуру і гэтак далей. Агітуем людзей за гэта. А вы за каго? За тых, хто грошы дае”, — сцвярджае спікер.
У Беларусі практычна не засталося незалежных грамадска-палітычных СМІ. Многія рэдакцыі пасля разгрому (вобшукі, канфіскацыя тэхнікі, арышты, блакаванне) альбо закрыліся, альбо працуюць за мяжой. Некаторыя незалежныя сеткавыя СМІ, якія засталіся ў краіне, у інтарэсах бяспекі пераключыліся на бытавыя тэмы.
