91% украінцаў не давярае Лукашэнку — сацапытанне

10 снежня, Позірк. Недавер да Аляксандра Лукашэнкі выказваюць 91,4% грамадзян Украіны, вынікае з апытання, праведзенага сацыёлагамі кампаніі Info Sapiens па замове кіеўскага аналітычнага цэнтра “Новая Еўропа”.

Згодна з атрыманымі данымі, у 2022 годзе Лукашэнку не давярала 94,3% украінцаў, у 2023-м — 95,8%.

Колькасць украінскіх грамадзян, якія давяраюць Лукашэнку, склала ў гэтым годзе 6% (у 2022-м — 3%, у 2023-м — 2,8%).

У абодвух рэйтынгах ён традыцыйна саступае толькі Уладзіміру Пуціну. Паводле даных апытання, не давяраюць прэзідэнту Расіі 95,9% украінцаў (97,2% і 97,4% у 2022 і 2023 гадах адпаведна), давяраюць — 1,4% (0,6% і 0,7%).

На трэцім месцы па ўзроўні недаверу ўкраінцаў знаходзіцца кіраўнік КНР Сі Цзіньпін — 84,6% (73,1% і 84,7%), пра давер да яго заявілі 8,6% апытаных (9,2% і 9,7%).

Лідарамі даверу сярод грамадзян Украіны сталі прэзідэнт Еўракамісіі Урсула фон дер Ляйен (65%) і прэзідэнт Польшчы Анджэй Дуда (64,5%). Далей ідуць: прэм’ер-міністр Канады Джасцін Трудо (59,9%), французскі прэзідэнт Эмануэль Макрон (58,4%) і прэзідэнт Малдовы Мая Санду (57,3%).

Даследаванне было праведзена з 15 па 27 лістапада 2024 года, выбарка складае 1.000 чалавек. Апытанне праводзілася метадам CATI (тэлефонныя інтэрв’ю з выкарыстаннем камп’ютара, computer-assisted telephone interviews) на аснове выпадковай выбаркі мабільных тэлефонных нумароў.

Мінск падтрымлівае Маскву ў развязанай ёю поўнамаштабнай вайне супраць Украіны. Лукашэнка прадастаўляў расійскім войскам тэрыторыю Беларусі для нападу на Украіну.