ЕАБР канстатаваў запаволенне інфляцыі ў Беларусі, захаваўшы прагноз на канец года

16 снежня, Позірк. Замаруджванне інфляцыі ў Беларусі канстатаваў Еўразійскі банк развіцця (ЕАБР).

Аналітыкі банка ў штотыднёвым макрааглядзе звярнулі ўвагу на тое, што інфляцыя знізілася да 5,5% (тут і далей — год да года; г/г) у лістападзе супраць 5,9% у кастрычніку. Пры гэтым адзначаецца, што яна запаволілася “па ўсіх ключавых кампанентах спажывецкага кошыка”.

“Рост цэн на прадукты харчавання сфармаваўся на ўзроўні 6,7% г/г пасля 7,2% г/г у выніку істотнага запаволення дынамікі цэн на сезонную гародніну і садавіну (4,7% г/г у лістападзе пасля 11% г/г у кастрычніку), — гаворыцца ў аглядзе. — Інфляцыя на нехарчовыя тавары склала 3,7% г/г у лістападзе пасля 4,1% г/г месяцам раней. У сегменце платных паслуг таксама фіксуецца запаволенне інфляцыі да 5,8% г/г у лістападзе пасля 6% г/г у кастрычніку”.

На канец 2024 года ЕАБР спрагназаваў інфляцыю “паблізу мэтавага арыентыру”, згадаўшы пра сваю справаздачу, апублікаваную на пачатку снежня. У тым дакуменце аналітыкі банка выказалі здагадку, што напрыканцы гэтага года інфляцыя ў Беларусі складзе 5,9%. Пры гэтым да канца 2025-га яна вырасце да 6,6%, 2026-га — да 7,9%, а 2027-га — знізіцца да 7,4%.

Міжнародны валютны фонд прагназуе, што рост цэн па выніках 2024 года складзе 6%, Еўразійскі фонд стабілізацыі і развіцця — 5,8%, даследчы цэнтр BEROC — 5,5-6%.

У 2023 годзе цэны выраслі на 5,8%.