12 банкаў паведамілі пра новаўвядзенні для кліентаў

16 снежня, Позірк. Шэраг банкаў, якія працуюць у Беларусі, змяніў асобныя правілы абслугоўвання і надаў новыя магчымасці для кліентаў, сведчыць праведзены “Позіркам“ маніторынг іх актуальных прэс-рэлізаў.

“Альфа Банк у Беларусі” змяніў валюту разлікаў з плацежнай сістэмай Mastercard з кітайскіх юаняў на еўра.

Ліміты выдачы наяўных грошай ва ўласных банкаматах і касах па картках, эмітаваных банкамі-нерэзідэнтамі, усталявалі “Банк БелВЭБ” — 49 базавых велічынь (1.960 рублёў), “Банк ВТБ (Беларусь)” — 25 б.в. (1.000), Банк “Рашэнне” — 24 б.в. (960), “Парытэтбанк” — 50 б.в. (2.000), “Тэхнабанк” — 1.990 рублёў.

“Белаграпрамбанк” цяпер патрабуе паказваць дакумент, які пацвярджае асобу, пры залічэнні праз касы наяўных сродкаў на бягучы (разліковы) рахунак фізічнай асобы.

“Беларусбанк” да 30 чэрвеня 2025 года праводзіць акцыю для карпаратыўных кліентаў “Заробак за адну капейку”. На працягу шасці месяцаў можна пералічваць заробак і прыраўнаваныя да яе плацяжы (асабістага даходу ІП) на адкрытыя ў “Беларусбанку” рахункі фізічных асоб за 1 капейку. Для гэтага неабходна адкрыць у банку рублёвы рахунак, падключыць яго да аднаго з прапанаваных пакетаў паслуг і заключыць адпаведную дамову.

“Белінвестбанк” увёў камісію на выдачу ва ўласных пунктах наяўных сродкаў па картках іншых банкаў: у беларускіх рублях — 3,5% сумы; картках банкаў-рэзідэнтаў і па картках банкаў-нерэзідэнтаў у замежнай валюце — 10%.

“Неа Банк Азія” зноў надае паслугу па адпраўцы і атрыманні пераводаў у беларускіх рублях праз сістэму “Залатая карона”. Паслуга не аказвалася з 26 лістапада.

“Сбер Банк (Беларусь)” з 26 снежня спыняе дзейнасць, звязаную з эмісіяй электронных грошай сістэмы ePay.

“Цэптэр Банк” прыпыніў магчымасць здымаць наяўныя грошы ва ўласных касах і банкаматах з выкарыстаннем картак, выпушчаных банкамі-нерэзідэнтамі.

На 1 лістапада 2024 года ў краіне зарэгістравана 22 банкі (адзін з іх — “Дэльта Банк” — знаходзіцца ў стадыі банкруцтва).

Прыбытак банкаў на 1 кастрычніка 2024 года склаў 2 млрд 842,3 млн рублёў — на 32% больш, чым на аналагічную дату 2023-га (2 млрд 152,6 млн), сведчыць праведзены “Позіркам” аналіз даных Нацыянальнага банка.

Нарматыўны капітал павялічыўся на 14,3% (з 19 млрд 196,8 млн да 21 млрд 944,4 млн рублёў), актывы, дастатковасць нарматыўнага капіталу — на 1,4 п.п. (з 19,3% да 20,7%), актывы, схільныя крэдытнай рызыцы, — на 14,4% (з 91 млрд 910,8 млн да 105 млрд 170,8 млн).