20 снежня, Позірк. Камітэт дзяржаўнай бяспекі 19 снежня ўнёс яшчэ дзевяць чалавек у спіс “асоб, якія маюць дачыненне да тэрарыстычнай дзейнасці”.
У пералік, апублікаваны ў тэлеграм-канале КДБ, уключаныя палітвязні Юрый Аверкаў, Дзмітрый Сідарэнка, Эдуард Кашацян, Уладзімір Алісіевіч, Андрэй Валахановіч, Ежы Грыгенча (асуджаны завочна), Вікторыя Верас, былы палітвязень Ціхан Клюкач, у дачыненні да якога вядзецца следства, і заснавальнік клінікі “Новы зрок” Алег Каўрыгін (асуджаны завочна).
Клюкач абвінавачваецца, а ўсе астатнія асуджаныя паводле арт. 130 Крымінальнага кодэкса (распальванне расавай, нацыянальнай, рэлігійнай або іншай сацыяльнай варожасці або варажнечы). Акрамя таго, Клюкач абвінавачваецца, а Аверкаў асуджаны таксама паводле арт. 293 КК (масавыя беспарадкі), Каўрыгін, Верас — паводле 361 КК (заклікі да мер абмежавальнага характару (санкцый), іншых дзеянняў, накіраваных на прычыненне шкоды нацбяспецы Беларусі).
Ціхан Клюкач пакінуў Беларусь, адбыўшы 1,5 гады зняволення за ўдзел у пратэстах. На волю выйшаў 9 сакавіка 2024 года. У траўні 2022-га ён заявіў, што далучыўся да палку Кастуся Каліноўскага (ПКК), які ваюе на баку Украіны, але пазней пакінуў шэрагі адзінкі.
Следчы камітэт Беларусі 13 снежня абвясціў пра пачатак спецвытворчасці ў дачыненні да васьмі беларускіх добраахвотнікаў ПКК, у тым ліку Клюкача.
У “спісе тэрарыстаў” 1.311 пазіцый і 1.219 чалавек; паводле падлікаў “Вясны”, 523 з іх — грамадзяне Беларусі. Абвешчаным “тэрарыстамі” зняволеным забаронена атрымліваць грашовыя пераводы.
