Паводле дэкларацыі аб даходах за 2023 год, у Лукашэнкі няма нерухомасці, аўтамабіля і “іншай маёмасці”

25 снежня, Позірк. У мэтах “найбольш поўнага інфармавання выбаршчыкаў аб кандыдатах у прэзідэнты” Цэнтрвыбаркам 25 снежня апублікаваў іх даныя аб даходах за 2023 год.

Паводле гэтай інфармацыі, найбольшы даход летась быў у Аляксандра Лукашэнкі — 203,6 тыс. рублёў. Гэтыя сродкі цалкам атрыманыя ў выглядзе заробку, вынікае са звестак ЦВК.

Пры гэтым, як вынікае з дэкларацыі, у Лукашэнкі няма ва ўласнасці нерухомай маёмасці, транспартных сродкаў і “іншай маёмасці”.

У члена сям’і гэтага кандыдата — Галіны Лукашэнкі — даход у мінулым годзе фарміраваўся з пенсіі і “даходаў ад акцый”, у суме ён склаў 9,2 тыс. рублёў. У жанчыны ёсць жылы дом у Шклове (Магілёўская вобласць) плошчай 196 квадратных метраў, палова дома ў вёсцы Вялікі Межнік Шклоўскага раёна (54 кв. м) і зямельны ўчастак (15 сотак) таксама ў Шклове. Лукашэнка належаць 56 акцый Шклоўскага масларобнага завода.

Даход лідара праўладнай Ліберальна-дэмакратычнай партыі Алега Гайдукевіча склаў 157,7 тыс. рублёў (зарплата, прафсаюзныя выплаты, выплаты па дагавору па аказанні паслуг, ўзнагароджанне па дагавору, даход ад продажу аўтамабіля). Ва ўласнасці ў дзейнага парламентарыя знаходзяцца кватэра ў Мінску (60 кв. м), легкавы аўтамабіль “Додж Чэленджэр”, а таксама матацыклы “Хонда” і “Мінск”.

Старшыня лаяльнай да Лукашэнкі Камуністычнай партыі Беларусі Сяргей Сыранкоў летась атрымаў 157,6 тыс. рублёў, вынікае з апублікаваных даных. Даход сфарміраваны заработнай платай, прафсаюзнымі выплатамі, сродкамі ад продажу аўтамабіля. Кандыдат валодае домам у Краснаполлі (Магілёўская вобласць), аўтамабілем “Пежо”.

У дэкларацыі камуніста пазначаны таксама даход Алесі Сыранковай (14,8 тыс. рублёў).

Згодна з дэкларацыяй, даход кіраўніка праўладнай Рэспубліканскай партыі працы і справядлівасці Аляксандра Хіжняка склаў у 2023 годзе 121,3 тыс. рублёў (зарплата, прафсаюзныя выплаты, выплаты да ўдзячных грамат, дывідэнды). Ён валодае аўтамабілямі “Таёта Камры” і “Лексус LS600”, а таксама 37 акцыямі ААТ “Аўтаспецтранс”.

Указаныя таксама даходы Алены Хіжняк (14,2 тыс. рублёў) і Мікіты Хіжняка (16,9 тыс.).

Былы член Аб’яднанай грамадзянскай партыі, дэпутат Палаты прадстаўнікоў у 2016–2019 гадах, удзельніца выбарчай кампаніі 2020 года Ганна Канапацкая атрымала ў мінулым годзе даход у памеры 94 тыс. рублёў (зарплата; даход ад прадпрымальніцкай дзейнасці; даход ад дзейнасці, якая абкладаецца падаткам на прафесійны даход; дывідэнды). У яе ўласнасці знаходзяцца кватэра ў Мінску (88 кв. м), 50% адміністрацыйнага будынка ў Мінску (48 кв. м), аўтамабіль “Лэнд Ровер Рэндж Ровер Эварджы”, 91 акцыя ААТ “Пухавіцкі КХП”, 90% статутнага капіталу фонду ТАА “Кінс-Агра”.

Сёмыя прэзідэнцкія выбары адбудуцца 26 студзеня 2025 года.

Кампанія праходзіць пад поўным кантролем уладаў. Палітычнае поле краіны цалкам зачышчана ад актыўных апанентаў Лукашэнкі. Прадстаўнікі беларускіх дэмакратычных сіл за мяжой называюць тое, што адбываецца, “спецаперацыяй па ўтрыманні ўлады”, праваабаронцы кажуць аб імітацыі канкурэнцыі.

З 1996 года ніводная выбарчая кампанія ў Беларусі не была прызнаная незалежнымі назіральнікамі транспарэнтнай і адпаведнай дэмакратычным стандартам.