Зараз пагрозы ўварвання войскаў Беларусі няма, заяўляе кіраўнік цэнтра пры РНБА Украіны Каваленка

8 студзеня, Позірк. На гэты момант пагрозы ўварвання рэгулярных войскаў Беларусі ва Украіну няма, заявіў кіраўнік Цэнтра па супрацьдзеянні дэзінфармацыі пры Радзе нацыянальнай бяспекі і абароны Украіны Андрэй Каваленка.

Прадстаўнік ведамства адзначыў у сваім тэлеграм-канале, што інфармацыя з “асобных крыніц” пра нарошчванне беларускіх войскаў паблізу ўкраінскай мяжы “не азначае стварэння ўдарных груповак і падрыхтоўкі да наступальных дзеянняў”.

Сілы абароны Украіны “цалкам кантралююць сітуацыю на мяжы”, падкрэсліў Каваленка.

Увечары 7 студзеня маніторынгавая група “Беларускі Гаюн” паведаміла, што Беларусь нарасціла вайсковую прысутнасць ва ўкраінскім прыграніччы. Паводле даных гэтай крыніцы, падраздзяленні сухапутных войскаў Узброеных сіл былі перакінутыя ў Столінскі, Лельчыцкі, Мазырскі і Гомельскі раёны.

Таксама было заяўлена, што напрыканцы снежня з Расіі ў Беларусь прылятаў вайскова-транспартны самалёт Іл-76 ВКС РФ.

Авіяцыйная актыўнасць назіралася на аэрадромах “Мачулішчы”, “Баранавічы” і “Лунінец”. Фіксаваліся палёты самалётаў і верталётаў Вайскова-паветраных сіл Беларусі і Паветрана-касмічных сіл РФ.

Расія з 24 лютага 2022 года вядзе поўнамаштабную вайну супраць Украіны, Мінск падтрымлівае Маскву. На раннім этапе агрэсіі тэрыторыя Беларусі выкарыстоўвалася для наземнага ўварвання і нанясення ракетных удараў.