Уезду ў Польшчу чакае каля 2.400 адзінак транспарту, у тым ліку 55 аўтобусаў

8 студзеня, Позірк. Каля 2.400 адзінак транспарту чакаюць уезду ў Польшчу, вынікае з інфармацыі Дзяржаўнага памежнага камітэта.

На 10:00 8 студзеня перад пунктам пропуску Цярэспаль (Брэст) сабралася больш за 2.300 легкавых аўтамабіляў. Там жа ў чарзе стаіць 55 аўтобусаў (у жніўні 2024 года іх колькасць у чарзе перад гэтым пунктам даходзіла да 108, у асобныя дні снежня — не было ўвогуле). На надгляд аднаго аўтобуса сыходзіць сама меней 30 хвілін.

Дзяржпагранкамітэт адзначае, што на працягу папярэдніх чатырох дзён польскія службы аформілі каля траціны транспарту ў чарзе перад пунктам Цярэспаль. Беларускі бок называе сітуацыю крытычнай.

“Нягледзячы на павелічэнне нагрузкі на адзіны маршрут руху ў Польшчу і шматкіламетровыя чэргі, польскі бок не робіць дзеянняў для вырашэння сітуацыі”, — заяўляе ведамства.

Пасля вынясення палітычна матываванага прыгавору журналісту, актывісту неафіцыйнага Саюза палякаў Беларусі Анджэю Пачобуту (8 гадоў пазбаўлення волі) 10 лютага 2023 года Польшча на нявызначаны тэрмін закрыла адзін з двух даступных для падарожнікаў пунктаў пропуску — Баброўнікі (Бераставіца).