У 2024 годзе спіс “экстрэмісцкіх фарміраванняў” павялічыўся на 89 пазіцый — “Вясна”

8 студзеня, Позірк. На сёння ў Беларусі налічваецца 257 “экстрэмісцкіх фарміраванняў”, 89 атрымалі статус у 2024 годзе, паведамляе праваабарончы цэнтр “Вясна”.

Удакладняецца, што ў мінулым годзе ў пералік уключаныя 10 СМІ, кааліцыі, якія балатаваліся на выбарах у Каардынацыйную раду, тэатральная трупа “Вольныя Купалаўцы“, шэраг грамадскіх арганізацый і ініцыятыў, замежныя фонды і інш.

Паводле звестак праваабаронцаў, за два месяцы 2021 года “экстрэмісцкім фарміраваннем” прызнана 27 груп, у 2022-м — 80, у 2023-м — 62, у 2024-м — 89.

56 рашэнняў у мінулым годзе прынята Камітэтам дзяржбяспекі, 33 — Міністэрствам унутраных спраў.

“Рашэнні аб прызнанні “экстрэмісцкімі фарміраваннямі” прымаюцца ў адміністрацыйным, пазасудовым парадку КДБ ці МУС без давядзення да грамадскасці канкрэтных падстаў для прыняцця такіх рашэнняў. Спрошчаны механізм прызнання арганізацый “экстрэмісцкімі фарміраваннямі“, а таксама адсутнасць у грамадзян доступу да інфармацыі і механізмаў судовай абароны ставіць пад пагрозу любыя праявы самаарганізацыі і салідарнасці грамадзян, у тым ліку ў адказ на грубыя парушэнні правоў чалавека”, — падкрэсліваюць праваабаронцы.

З 2021 года, паводле іх звестак, за “стварэнне экстрэмісцкага фарміравання або ўдзел у ім” паводле арт. 3611 Крымінальнага кодэкса вынесеныя прыгаворы ў дачыненні да не менш за 248 чалавек.