Два чалавекі прагаласавалі супраць перавыбрання Віктара Лукашэнкі прэзідэнтам НАК

15 студзеня, Позірк. Віктар Лукашэнка пераабраны прэзідэнтам Нацыянальнага алімпійскага камітэта (НАК) на новы чатырохгадовы тэрмін, паведамляе прэс-служба арганізацыі.

Адзначаецца, што яго кандыдатуру 15 студзеня на Генасамблеі НАК падтрымалі 82 дэлегаты, двое прагаласавала супраць, трое ўстрымаліся.

Пра іншых кандыдатаў на пасаду не паведамляецца.

Па выніках галасавання віцэ-прэзідэнтам пераабраны Дзмітрый Даўгалёнак (за — 67, супраць — 9, устрымалася — 11).

У выканкам НАК, акрамя Лукашэнкі і Даўгалёнка, увайшлі: Андрэй Барбашынскі (дырэктар Рэспубліканскага вучылішча алімпійскага рэзерву), Аляксандр Багдановіч (старшыня Федэрацыі хакея Беларусі), Алена Зубрылава (старшы трэнер зборнай Беларусі па біятлоне), Ірына Маляваная (дырэктар Рэспубліканскага навукова-практычнага цэнтра спорту), Аляксей Пракаповіч (старшыня федэрацыі настольнага тэніса), Сяргей Рутэнка (старшыня Беларускай тэніснай федэрацыі), Алім Селімаў (старшыня Беларускай федэрацыі барацьбы), Любоў Чаркашына (старшы трэнер зборнай па мастацкай гімнастыцы), Наталля Цылінская (старшыня Беларускай федэрацыі веласіпеднага спорту).

Галасаванне было таемным, падкрэсліваецца ў паведамленні.

Віктар Лукашэнка ўзначаліў НАК 26 лютага 2021 года, раней арганізацыяй з 1997 года кіраваў яго бацька Аляксандр Лукашэнка. Ён пакінуў пасаду пад ціскам Міжнароднага алімпійскага камітэта (МАК) у сувязі з рэпрэсіямі спартсменаў пасля прэзідэнцкіх выбараў 2020 года.

МАК не прызнаў Віктара Лукашэнку легітымным кіраўніком НАК. Ён таксама знаходзіцца пад санкцыямі ЗША, Еўрапейскага саюза, Вялікабрытаніі, Швейцарыі, Канады, Албаніі, Ісландыі, Ліхтэнштэйна, Нарвегіі, Паўночнай Македоніі, Чарнагорыі, Украіны, Аўстраліі, Японіі і Новай Зеландыі.