Сікорскі заявіў, што абраным прэзідэнтам Беларусі з’яўляецца Ціханоўская, і ўзяў у самалёт на Брусель

26 студзеня, Позірк. Радослаў Сікорскі, міністр замежных спраў Польшчы, якая старшынствуе ў ЕС у першай палове 2025 года, і беларускі дэмакратычны лідар Святлана Ціханоўская ўвечары 26 студзеня разам паляцелі ў Брусель на пасяджэнне кіраўнікоў знешнепалітычных ведамстваў краін Еўрасаюза.

У публікацыі на сваёй старонцы “Х” (раней “Твітар”) Сікорскі запрашае Ціханоўскую сесці з ім у самалёт. Пры гэтым ён кажа: “Лукашэнка арганізаваў сёння выбарчы фарс, а мы ляцім у Брусель з чалавекам, якая сапраўды была абраная прэзідэнтам. Спадарыня прэзідэнт, сардэчна запрашаем”.

Раней у той самы дзень Сікорскі іранічна выказаўся пра інтрыгу беларускіх выбараў: “Сёння ў Беларусі “выбары”. Чаканне таго, хто будзе абвешчаны пераможцам, невыноснае”.

У сваю чаргу, МЗС Беларусі (таксама ў “Х”) адказаў Сікорскаму: “Міністр, выбары ў Польшчы адбудуцца 18 траўня 2025 года (прэзідэнцкія. — “Позірк”.), і толькі яны павінны вас хваляваць. Так што займайцеся праблемамі сваёй краіны і свайго народа, і “не суньце свой нос куды не трэба”, як толькі што сказаў прэзідэнт Лукашэнка”.

Апошняя заўвага, з ўсёй бачнасці, тычыцца выказванняў Лукашэнкі 26 студзеня. Палітык у ліку іншага заклікаў Польшчу “гандляваць, зямлю араць і купляць трактары, а не танкі” і “паклапаціцца пра выбары ў сваёй краіне, а не пра беларускія”.

Згодна з папярэднім парадкам пасяджэння савета міністраў замежных спраў краін ЕС, на вечар 26 студзеня запланаваная вячэра ад імя вярхоўнага прадстаўніка Еўрасаюза па замежных справах і палітыцы бяспекі Каі Калас, на якой будзе абмеркаваная сітуацыя ў Беларусі. На парадку дня асноўнага пасяджэння 27 студзеня беларускага пытання пакуль няма.

26 студзеня Кая Калас і камісар па пытаннях пашырэння ЕС Марта Кос выступілі з сумеснай заявай, у якой адзначылі, што Еўрасаюз не прызнае сёлетнія выбары ў Беларусі.