У Польшчы спынена дзейнасць арганізаванай злачыннай групоўкі, куды ўваходзілі грамадзяне Беларусі

22 лютага, Позірк. У выніку расследавання, якое праходзіла ў 2020–2024 гадах, у Польшчы спынена дзейнасць арганізаванай злачыннай групоўкі, якая займалася падробкай дакументаў. У яе склад уваходзілі грамадзяне Беларусі і Украіны, паведаміла 21 лютага памежная служба краіны.

Злачынцы прапаноўвалі разнастайныя падробленыя афіцыйныя польскія і замежныя дакументы: пашпарты, іншыя пасведчанні асобы, візы, карты пражывання, правы кіроўцы, медыцынскія даведкі, працоўныя дамовы, пасведчанні аб рэгістрацыі.

Падазраванымі па справе праходзяць 42 чалавекі, сярод якіх не толькі ўдзельнікі групоўкі, але і асобы, якія скарысталіся яе паслугамі. Арыштавана 8 чалавек, іх грамадзянства не ўдакладняецца. Забраная маёмасць у выглядзе грашовых сродкаў на агульную суму, эквівалентную прыкладна 1 млн. злотых (каля 250 тыс. долараў ЗША). Выяўлена больш за 12 тыс. розных відаў падробленых дакументаў, нібыта выдадзеных установамі еўрапейскіх краін. Яны былі падрыхтаваныя да выкарыстання для легалізацыі знаходжання замежнікаў на тэрыторыі краін ЕС.

Адзначаецца, што супрацоўнікі аператыўна-следчай групы памежнай заставы Карчова (мяжа Польшчы і Украіны) у Падкарпацкім ваяводстве выйшлі на след групоўкі ў 2020 годзе, калі на адным з памежных пунктаў замежнік скарыстаўся падробленымі правамі кіроўцы. Расследаванне праводзілася пад наглядам акруговай пракуратуры ў Пшэмыслі пры падтрымцы іншых падраздзяленняў Памежнай аховы Польшчы і Еўраполу.

Задачы ў групе былі строга падзелены, некаторыя яе члены займаліся вырабам і дастаўкай падробленых дакументаў атрымальнікам на тэрыторыі Польшчы і іншых краін ЕС, астатнія выконвалі заданні, звязаныя з адкрыццём банкаўскіх рахункаў і пераводам сродкаў, атрыманых злачынным шляхам.

Як устаноўлена падчас расследавання, атрымальнікі падробленых дакументаў плацілі ў сярэднім 1,5 тыс. еўра за адзінку. “Паслуга” прапаноўвалася на сайтах і ў сацыяльных сетках. Падтрымка таксама аказвалася праз “сэрвісны офіс”, які кантактаваў з людзьмі, зацікаўленымі ў набыцці падробак.

Першая нелегальная друкарня была знойдзена ў 2021 годзе ў Катавіцах. Там былі затрыманыя асобы, якія выраблялі дакументы і адпраўлялі іх атрымальнікам з дапамогай міжнародных паштовых аператараў.

У 2023 годзе ў Катавіцах была выяўлена яшчэ адна фабрыка падробленых дакументаў, якая належала групоўцы. Былі знойдзены і канфіскаваны друкаванае абсталяванне, афіцыйныя пячаткі, наяўныя грошы і падробленыя дакументы. Двое грамадзян Украіны былі затрыманыя з доказамі злачынства на месцы злачынства. У Гданьску таксама было знойдзена памяшканне, якое належыць злачыннай групоўцы. У 2024 годзе ў Кракаве затрымалі яшчэ аднаго грамадзяніна Украіны, адказнага за адпраўку падробленых дакументаў атрымальнікам па ўсёй Еўропе.

Расследаванне завяршылася ў снежні 2024 года ў Катавіцах, дзе супрацоўнікі Бяшчадскага аддзялення памежнай аховы пры падтрымцы галоўнага ўпраўлення памежнай аховы і бюро Еўраполу затрымалі сем чалавек. Ім прад’яўлены абвінавачанні ва ўдзеле ў арганізаванай злачыннай групе, адмыванні грошай, перашкодах следству і ўтойванні слядоў злачыннай дзейнасці.