За тыдзень на падставе бязвізу Беларусь наведала 3.892 жыхары еўрапейскіх дзяржаў

24 лютага, Позірк. З 17 да 24 лютага Беларусь у бязвізавым парадку наведала 3.892 жыхары еўрапейскіх дзяржаў (на папярэднім тыдні 3.647), вынікае з інфармацыі Дзяржаўнага пагранічнага камітэта.

За тыдзень у краіну накіравалася 1.184 грамадзяніны і неграмадзяніны Латвіі (за папярэдні справаздачны перыяд — 1.074), 1.787 грамадзян Літвы (1.726), 436 грамадзян Польшчы (432) і 485 грамадзян з ліку прадстаўнікоў іншых еўрапейскіх дзяржаў (415).

Усяго з 15 красавіка 2022 года краіну наведала 1.057.967 еўрапейцаў: грамадзян і неграмадзян Латвіі — 332.757, грамадзян Літвы — 599.924, Польшчы — 106.864, іншых краін Еўропы — 18.422.

Бязвізавы рэжым дзейнічае з 15 красавіка 2022 года для жыхароў Латвіі і Літвы, з 1 ліпеня таго ж года — для жыхароў Польшчы. 19 ліпеня 2024 года беларускія ўлады распаўсюдзілі бязвізавы рэжым на грамадзян яшчэ 35 краін Еўропы.

Гаворка пра жыхароў Аўстрыі, Андоры, Бельгіі, Балгарыі, Босніі і Герцагавіны, Ватыкана, Вялікабрытаніі, Венгрыі, Германіі, Грэцыі, Даніі, Ірландыі, Ісландыі, Іспаніі, Італіі, Кіпра, Ліхтэнштэйна, Люксембурга, Мальты, Манака, Нідэрландаў, Нарвегіі, Партугаліі, Румыніі, Сан-Марына, Паўночнай Македоніі, Славакіі, Славеніі, Фінляндыі, Францыі, Харватыі, Чэхіі, Швейцарыі, Швецыі і Эстоніі. Большасць гэтых краін рэжым Лукашэнкі лічыць “недружалюбнымі” за тое, што ўвялі санкцыі альбо далучыліся да іх.

Грамадзяне гэтых дзяржаў могуць уязджаць у Беларусь без візы праз усе наземныя і паветраныя міжнародныя пункты пропуску “на падставе сапраўдных дакументаў”, знаходзіцца на беларускай тэрыторыі “не больш за 30 сутак з дня ўезду”.

13 снежня 2024 года бязвіз для жыхароў 38 еўрапейскіх краін падоўжаны да канца 2025-га.