Ціханоўская: Расія ўпілася каранямі ў нашую краіну і зрабіла саўдзельнікамі вайны
24 лютага, Позірк. “Мы супраць вайны і імкнёмся выхоўваць дзяцей, якія шануюць мір і волю, а не адгароджваюцца ад іншых калючым дротам”, — заявіла беларускі дэмакратычны лідар Святлана Ціханоўская з нагоды трэцяй гадавіны пачатку поўнамаштабнай вайны Расіі супраць Украіны. Яна падкрэсліла, што беларусы з’яўляюцца “самадастатковай нацыяй”.
“Расія ўпілася каранямі ў нашую краіну і зрабіла саўдзельнікамі гэтай вайны. Але беларусы не жадаюць такога “паплечніка”: ні ў якасці “старэйшага брата”, ні ў якасці крэдытора, ні ў якасці палітычнага партнёра”, — адзначыла палітык у сваім тэлеграм-канале.
Дэмлідар звярнула ўвагу на тое, што Расія пазбягае слова “вайна”. “Мы не пачуем ад пуцінскага рэжыму пра разбурэнні і смерці, — адзначыла яна. — Не даведаемся пра больш за 600 забітых дзяцей і сотні людзей, сталых і маладзёнаў, якія гінуць штодня. Замест гэтага прапаганда расказвае пра “подзвігі” і “мужнасць”. Мы зноў і зноў чуем байкі пра “абароненасць” і “стабільнасць”.
Нагадаўшы пра ўкаранёную ў свядомасць устаноўку: “Абы не было вайны”, дэмлідар заклікала “паглядзець праўдзе ў вочы” — вайна “ўжо ідзе”. “І Расія з кожным днём памнажае яе жахі, — падкрэсліла спікер. — Мы можам не заўважаць бамбардзіроўкі жылых дамоў, ігнараваць гвалт у Бучы і Ірпені, пазбягаць навін, спрабаваць жыць, як звычайна, і абстрагавацца ад рэчаіснасці. Але людзі не перастануць паміраць”.
Ціханоўская звярнулася да беларусаў з заклікам: “Не дайце шанцу “рускаму свету” прарасці ў вас. Не верце ніводнаму слову пра “неабходныя страты” і “дэнацыфікацыю”.
Калі на гарызонце “віднеецца магчымасць перамоў”, усе спадзяюцца, што “хутка ва Украіне настане мір”. Але, паводле слоў палітыка, важна памятаць, “хто развязаў гэтую вайну і на кім ляжыць адказнасць за сотні тысяч бессэнсоўных смерцяў”.
Расійскія войскі, якія прыбылі на беларускую тэрыторыю для ўдзелу ў вучэннях “Саюзная рашучасць — 2022”, пасля іх заканчэння не былі з яе выведзеныя і выкарыстоўваліся для ўварвання ва Украіну 24 лютага 2022 года. Афіцыйны Мінск падтрымлівае агрэсію РФ. На раннім этапе агрэсіі тэрыторыя Беларусі выкарыстоўвалася для наземнага ўварвання і нанясення ракетных удараў.