24 лютага, Позірк. За тры гады поўнамаштабнай расійскай ваеннай агрэсіі супраць Украіны і саўдзелу ў гэтым Беларусі афіцыйны курс долара да беларускага рубля вырас на 22% (з 2,6419 да 3,2239), да расійскага — на 9,6% (з 80,4194 да 88,1676), сведчыць праведзены “Позіркам“ параўнальны аналіз каціровак.
Такім чынам, беларускі рубель абясцэніўся да долара ў 2,3 раза больш за расійскі.
Па выніках першага года вайны долар да беларускага рубля вырас на 5,9%, да расійскага — знізіўся на 7,1%; другога — вырас на 16% да беларускага і на 24,2% да расійскага, трэцяга — знізіўся на 0,7% да беларускага і на 4,9% да расійскага.
Ва Украіне долар падаражэў за тры гады вайны на 42,6% (з 29,2549 да 41,7316 грыўны): за першы — на 25%, за другі — на 5,2%, за трэці — на 8,4%. З 24 лютага па 20 ліпеня 2022 года афіцыйны курс долара быў зафіксаваны на адзнацы 29,2549 грыўны, з 21 ліпеня 2022 года па 2 кастрычніка 2023 года — 36,5686 (+25%). 3 кастрычніка 2023 года фіксаваны курс быў адменены.
