“Камісія па вяртанні” разгледзела 241 зварот, у краіну вярнулася 20 чалавек — Швед
26 лютага, Позірк. Камісія па разглядзе зваротаў грамадзян Беларусі па пытаннях здзяйснення імі правапарушэнняў (“камісія па вяртанні”) разгледзела 241 зварот, паведаміў журналістам яе кіраўнік, генеральны пракурор Андрэй Швед 26 лютага пасля выступу на пасяджэнні Палаты прадстаўнікоў і Савета Рэспублікі.
Паводле слоў чыноўніка, якія прыводзіць прэс-служба Генпракуратуры, больш за 30 грамадзян атрымалі станоўчы адказ, 20 чалавек вярнуліся ў Беларусь.
“Сталі звяртацца нават бацькі маладых людзей, якія баяцца вяртацца ў нашую краіну. Мы заўважаем пэўную актыўнасць”, — заявіў Швед.
Усім, хто вярнуўся на радзіму праз камісію, паводле слоў генпракурора, “прапануецца расказаць праўду пра тое, як ім там жылося за мяжой, якое стаўленне рэальнае да беларусаў”.
4 лютага Швед паведаміў, што прыкладна 40 асобам патлумачэнні, што яны “могуць спакойна вяртацца”, да іх у сілавікоў няма ніякіх прэтэнзій.
На сустрэчы з генпракурорам, якая адбылася ў той жа дзень, Лукашэнка заявіў пра мэтазгоднасць захавання “камісіі па вяртанні”, кіраўнік гэтай структуры запэўніў, што яна працягне працаваць.
Паводле інфармацыі праваабарончага цэнтра “Вясна”, за паўтара месяца ад пачатку 2025 года пасля вяртання ў Беларусь затрымалі некалькі дзясяткаў чалавек.
Камісія была створана пасля нарады ў Лукашэнкі 24 студзеня 2023 года. Адпаведны ўказ ён падпісаў 6 лютага таго ж года. 17 кастрычніка 2024-га стала вядома, што паўнамоцтвы камісіі пашыраныя — цяпер яна можа разглядаць заявы асоб, якія пражываюць у Беларусі.
3 снежня 2024 года цэнтр BEROC прадставіў даследаванне “Адаптацыйныя стратэгіі мігрантаў з Беларусі і Украіны на рынку працы Еўрапейскага саюза”, згодна з высновай якога большасць беларусаў, якія эмігравалі, гатова вярнуцца на радзіму ў выпадку змены ўлады і спынення рэпрэсій.
Навуковы супрацоўнік BEROC Віялета Панасевіч адзначыла, што, паводле розных ацэнак, пасля падзей 2020 года з Беларусі з’ехала каля 500 тыс. чалавек. У праведзеным цэнтрам апытанні прынялі ўдзел 172 беларусы (а таксама 392 украінцы), якія пражываюць на тэрыторыі Польшчы ці Літвы на працягу 2–4 гадоў.