Амбасадар Глаз абмеркаваў у МЗС Турцыі стасункі Мінска і Анкары, заяўлена пра іх стратэгічны характар

3 сакавіка, Позірк. Амбасадар Беларусі Анатоль Глаз уручыў копіі даверчых грамат генеральнаму дырэктару дэпартамента пратакола Міністэрства замежных спраў Турцыі Ахмету Джэмілу Міраглу, паведамляе прэс-служба беларускага знешнепалітычнага ведамства.

Адметна, што сустрэча адбылася яшчэ 28 лютага, аднак прэс-служба МЗС, якую да адбыцця на месца дыпламатычнай службы ўзначальваў Глаз, паведаміла пра яе толькі 3 сакавіка.

Адзначаецца, што бакі абмеркавалі “актуальныя пытанні беларуска-турэцкіх стасункаў і канстатавалі іх сяброўскі і стратэгічны характар”. “Адзначылі наяўнасць значнага патэнцыялу для нарошчвання ўзаемадзеяння ў розных сферах”, — гаворыцца ў паведамленні.

Анатоль Глаз займаў пасаду прэс-сакратара МЗС Беларусі з сярэдзіны чэрвеня 2018 года. Пасля прызначэння амбасадарам у Турцыі 14 студзеня 2025 года ён працягваў выконваць функцыі прадстаўніка знешнепалітычнага ведамства. Напрыклад, ён каментаваў рэакцыю краін Захаду на мерапрыемства, што прайшло 26 студзеня, якое афіцыйны Мінск называе “прэзідэнцкімі выбарамі”.

Рэджэп Таіп Эрдаган, прэзідэнт Турцыі — краіны, якая з’яўляецца членам НАТО, — павіншаваў Аляксандра Лукашэнку з “перавыбраннем” 30 студзеня.