Грамадзяніна Эстоніі Роя пачнуць судзіць 17 сакавіка паводле чатырох “палітычных” артыкулаў

4 сакавіка, Позірк. Мінскі гарадскі суд 17 сакавіка пачне разглядаць справу грамадзяніна Эстоніі Алана Роя, вынікае з раскладу на партале электроннага судаводства.

Замежнік, а таксама вядомы беларускі баскетбольны суддзя Аляксандр Сырыца, які праходзіць па той жа справе, абвінавачваюцца паводле ч. 3 арт. 130 (распальванне расавай, нацыянальнай, рэлігійнай або іншай сацыяльнай варожасці або варажнечы), ч. 1 і 2 арт. 361¹ (стварэнне экстрэмісцкага фарміравання або ўдзел у ім), ч. 1 арт. 367 (паклёп у дачыненні да прэзідэнта) і ч. 1 арт. 368 (абраза прэзідэнта) Крымінальнага кодэкса.

Працэс правядзе суддзя Анжэла Касцюкевіч, якая раней вынесла шэраг палітычна матываваных выракаў.

Паводле інфармацыі медыя і праваабаронцаў, Роя 44 гады, ён нарадзіўся ў Тарту. У следчым ізалятары ён знаходзіцца больш за год.

16 студзеня 2024 года Камітэт дзяржаўнай бяспекі прызнаў “экстрэмісцкім фарміраваннем” групу асоб, звязаных з арганізацыяй Fund of Belarus Friend LTD, пералічыўшы ў якасці датычных да яе Роя, а таксама грамадзян Беларусі — Сырыцу і Алега Стэфановіча.

12 сакавіка таго ж года КДБ надаў аналагічны статус групе асоб, звязаных з зарэгістраванай на той момант у Эстоніі арганізацыяй Fund of Belarus friends MTU. У спісе тых, хто мае дачыненне, акрамя Роя, таксама фігураваў эстонскі грамадзянін Нігол Каіда.

Наяўнасць у пераліку “экстрэмісцкіх фарміраванняў” двух згадак арганізацыі, верагодна, звязаная з тым, што ў 2020 годзе яна была зарэгістраваная як у Эстоніі, так і ў Вялікабрытаніі. Заснавальнікі заяўлялі, што іх задача заключаецца ў тым, каб “дапамагчы людзям з Беларусі, што пацярпелі ад рэпрэсій з боку мясцовых дыктатараў і ўрада”. Варта адзначыць, што пасля арганізацыя была ліквідаваная: напрыканцы 2022 года — у Вялікабрытаніі, увесну 2024-га — у Эстоніі.

Сырыца ў апошнія гады жыў у Аўстраліі. Яго затрымалі на пачатку мінулага году пры перасячэнні беларускай мяжы.