Мінулым днём на ўсіх метэастанцыях Беларусі зафіксаваныя тэмпературныя рэкорды
7 сакавіка, Позірк. На ўсіх метэастанцыях Беларусі 6 сакавіка абнавіліся тэмпературныя рэкорды, сведчыць праведзены “Позіркам” параўнальны аналіз аператыўных і архіўных даных Белгідрамета.
Новы абсалютны максімум дня зафіксаваны ў Самахвалавічах — 19,7 градуса вышэй за нуль. Ранейшы экстрэмум пратрымаўся 30 гадоў (17 градусаў у Брэсце).
1995-м годам датуюцца перакрытыя рэкорды на ўсіх станцыях, акрамя Нарачы (2013), Мсціслава (2017) і Стоўбцаў (2017).
У Мінску паветра прагрэлася да 16,9 градуса (было 14,5), у Гомелі — да 18,8 (16,1), Брэсце — да 18,4 (17), Магілёве — да 17,3 (13,5), Гродне — да 16,9 (12,7), Віцебску — да 14 (12,3).