У Асіповіцкім раёне гарыць тарфянік, тушэнне ўскладненае глыбінёй залягання торфу

10 сакавіка, Позірк. Каля вёскі Краі (Асіповіцкі раён Магілёўскай вобласці) працягваюць тушыць тарфяны пажар, вынікае з аператыўнай зводкі Міністэрства па надзвычайных сітуацыях.

“Для ліквідацыі пажару задзейнічана 13 адзінак тэхнікі і 40 чалавек, з іх 10 адзінак тэхнікі і 35 работнікаў МНС, — адзначае ведамства. — Тушэнне ўскладняецца цяжкапраходнымі ўчасткамі мясцовасці, адсутнасцю натуральнай вільготнасці і вялікай глыбінёй залягання торфу. Пажар лакалізаваны, па стане на 06:00 10.03.2025 плошча пажару складае 0,2 га”.

Паводле даных МНС, з 6:00 9 сакавіка да 6:00 10 сакавіка ў Беларусі ліквідавана 10 тарфяных пажараў на агульнай плошчы 2,645 гектара. Акрамя таго, за гэты ж час патушана 245 пажараў травы і кустоў (39,711 га) і 18 лясных пажараў (13,461 га).

Больш за ўсё лясных пажараў ліквідавана ў Брэсцкай вобласці — 9; у Гомельскай — 4, Мінскай — 3, Гродзенскай — 2.

“У сувязі з ростам колькасці загаранняў у прыродных экасістэмах Брагінскае, Ельскае, Жыткавіцкае, Лельчыцкае, Мазырскае і Петрыкаўскае звёны Гомельскай тэрытарыяльнай падсістэмы ДСНС, на падставе распараджэнняў адпаведных райвыканкамаў, знаходзяцца ў рэжыме павышанай гатоўнасці функцыянавання”, — заяўляе МНС.

9 сакавіка міністэрства таксама справаздачылася пра ліквідацыю 18 лясных пажараў.