КДБ прызнаў “экстрэмісцкім фарміраваннем” праект “Беларускі OSINT “Фенікс”

12 сакавіка, Позірк. Камітэт дзяржбяспекі 11 сакавіка ўключыў праект “Беларускі OSINT “Фенікс” у спіс “экстрэмісцкіх фарміраванняў”, адпаведныя змены ўнесеныя ў спіс на сайце Міністэрства ўнутраных спраў.

Датычным да праекта названы Віталь Кандраценка, мужчына таксама вядомы як блогер з псеўданімам “Вірус”.

На ютуб-канал праекта падпісана 18,9 тыс. чалавек, ён распавядае пра ўкраінскую і беларускую палітыку, сярод іншага крытыкуе беларускія дэмакратычныя сілы. На канале, у прыватнасці, апублікаванае відэа пра дэмакратычнага лідара Святлану Ціханоўскую, якое называецца “Мацька”, па аналогіі са словам “Бацька”, — так прапаганда звычайна называе Аляксандра Лукашэнку.

Цяпер у спісе 268 “экстрэмісцкіх фарміраванняў”.

Дзейнасць, якая прылічаецца да “экстрэмісцкай”, пераследуецца ўладамі ў крымінальным парадку. Гэта адзін з актыўных інструментаў палітычных рэпрэсій.