Расія выдзеліла менш за траціну крэдытных сродкаў на рэалізацыю сумесных з Беларуссю праектаў імпартазамяшчэння — СМІ

13 сакавіка, Позірк. Расія на дадзены момант вылучыла Беларусі каля 33,4 з запланаваных 105 млрд рублёў (31,8%; больш за 386 млн долараў паводле сённяшняга курсу) у рамках дзяржаўнага крэдыту на рэалізацыю праектаў прамысловай кааперацыі для імпартазамяшчэння, паведаміла агенцтва ТАСС са спасылкай на матэрыялы, падрыхтаваныя да праведзенай 13 сакавіка ў Маскве сустрэчы Уладзіміра Пуціна з Аляксандрам Лукашэнкам.

Адзначаецца, што зацверджана 27 такіх праектаў, сродкі дзяржкрэдыту размеркаваны ў поўным аб’ёме, 23 праекты знаходзяцца ў працэсе рэалізацыі.

ТАСС нагадвае, што “пагадненне аб выдзяленні беларускаму боку крэдыту на 105 млрд рублёў, які будзе накіраваны на рэалізацыю праектаў у сферы імпартазамяшчэння на фоне заходніх санкцый, Масква і Мінск заключылі ў лістападзе 2022 года”: “Прадугледжваецца, што выконвацца праекты будуць у Беларусі ў кааперацыі з расійскім бокам”.

7 кастрычніка мінулага года амбасадар Беларусі ў Расіі Аляксандр Рагожнік паведаміў аб прапрацоўцы “дадатковага пула імпартазамяшчальных праектаў”, каб павялічыць суму крэдыту, які прадастаўляецца РФ, як мінімум да 200 млрд (з 1,21 да 2,31 млрд долараў па актуальным курсе Цэнтрабанка РФ).