Праз непагадзь парушана электразабеспячэнне паселішчаў у Пухавіцкім раёне

14 сакавіка, Позірк. Спецыялісты аднаўляюць парушанае непагаддзю электразабеспячэнне дзесяці населеных пунктаў у Пухавіцкім раёне (Мінская вобласць), паведамляе прадпрыемства “Мінскэнерга”.

Паводле звестак арганізацыі, перабоі ў падачы электраэнергіі ўзніклі праз шквалісты вецер, дождж і мокры снег.

“У некаторых рэгіёнах Мінскай вобласці вецер перавышае 30 м/с. Гэта ў сваю чаргу выклікае падзенне галін, а ў некаторых выпадках і цэлых дрэў на лініі электраперадачы. <…> Энергетыкі РУП “Мінскэнерга” працягваюць працу ў рэжыме падвышанай гатоўнасці для неадкладнай рэакцыі на любыя збоі, што ўзнікаюць”, — гаворыцца ў паведамленні.

Шкала Бофарта класіфікуе вецер хуткасцю 30 метраў на секунду як жорсткі шторм (11 балаў з 12).

Раней пра ўзмацненне ветра 14 сакавіка папярэдзіла Міністэрства па надзвычайных сітуацыях.