У Слуцку ў выніку наезду пагрузчыка загінуў электраманцёр

18 сакавіка, Позірк. 40-гадовы электраманцёр загінуў у выніку наезду аўтапагрузчыка на тэрыторыі адной з фабрык у Слуцку (Мінская вобласць), паведаміла 18 сакавіка афіцыйная прадстаўніца абласнога ўпраўлення Следчага камітэта (СК) Марыя Нікіціна.

Паводле яе слоў, якія перадае прэс-служба ведамства, трагедыя адбылася 12 сакавіка.

Паводле даных следства, у той дзень каля 15-й гадзіны 31-гадовы кіроўца пагрузчыка “рухаўся па няроўнай паверхні тэрыторыі прадпрыемства”. Наезд на электраманцёра ён здзейсніў “у выніку неасцярожнасці і няўважлівасці”, сказала Нікіціна.

“Паводле папярэдняй інфармацыі, перад пачаткам руху і выкананнем манеўру кіроўца пагрузчыка не пераканаўся ў бяспецы прац, якія праводзіліся, што і прывяло да трагічных наступстваў. Устаноўлена, што фігурант працаваў па спецыяльнасці менш за месяц”, — адзначылі ў СК.

У дачыненні да кіроўцы распачата крымінальная справа паводле ч. 1 арт. 144 КК (прычыненне смерці па неасцярожнасці). Санкцыі гэтага артыкула прадугледжваюць пакаранне ад папраўчых работ да трох гадоў пазбаўлення волі.

Адзначаецца, што “ў рамках расследавання будуць устаноўленыя ўсе абставіны здарэння, асаблівую ўвагу следчыя нададуць прычынам і ўмовам, якія спрыялі трагедыі на працоўным месцы”.

Колькасць работнікаў, што пацярпелі ў выніку няшчасных выпадкаў на вытворчасці, у 2024 годзе павялічылася на 2,4% (з 1.659 на канец 2023-га да 1.698 на канец 2024-га), сведчыць праведзены “Позіркам” аналіз звестак Нацыянальнага статыстычнага камітэта.

З іх 64 падчас інцыдэнту знаходзіліся ў стане ап’янення (48; +33,3%).

За год на прадпрыемствах краіны загінула 70 чалавек (83; -15,7%), з іх п’янымі былі 15 (6; рост у 2,5 разы).

На прэс-канферэнцыі 10 чэрвеня 2024 года першы намеснік дырэктара Дэпартамента дзяржінспекцыі працы Міністэрства працы і сацыяльнай абароны Дзяніс Тамашаў заявіў, што асноўнымі прычынамі траўмавання на вытворчасці з’яўляецца “невыкананне кіраўнікамі і спецыялістамі абавязкаў па ахове працы”.