Лябедзька пра пагрозы СК удзельнікам Дня Волі за мяжой: Юрысдыкцыя сілавых ведамстваў Беларусі не распаўсюджваецца на Польшчу ці Літву

24 сакавіка, Позірк. Беларускія ўлады не маюць права прыцягваць да адказнасці грамадзян, якія ўдзельнічаюць у легальных масавых мерапрыемствах за межамі краіны, вынікае з каментара кіраўніка цэнтра “Еўрапейскі дыялог”, дарадцы Святланы Ціханоўскай па канстытуцыйнай рэформе і парламенцкім супрацоўніцтве Анатоля Лябедзькі.

Паводле яго слоў, апублікаваных у “Парламенцкім канале”, такія грамадзяне “абавязаны пры правядзенні публічных, вулічных мерапрыемстваў кіравацца дзеючым заканадаўствам краіны, у якой пражываюць”.

“Юрысдыкцыя сілавых ведамстваў Беларусі ніяк не распаўсюджваецца на Польшчу ці Літву. Іх рэпрэсіўныя дзеянні — палітыка ў чыстым выглядзе, — падкрэсліў Лябедзька. — Намаганні беларускіх сілавікоў, а гэта сотні людзей, мільёны бюджэтных сродкаў, накіраваныя на пошук каналаў распаўсюджвання страху. Абсурд узведзены ў ранг дзяржаўнай палітыкі”.

“Вось я 25 сакавіка планую ўдзельнічаць ва ўрачыстасцях, арганізаваных Сеймам Літвы, і будзе цікава паглядзець, як такія дзеянні будзе кваліфікаваць Следчы камітэт. Можа, завочна асудзяць [дэпутата Еўрапейскага парламента ад Літвы] Юозаса Алекаса, як суарганізатара?! Памеры прававога бязмежжа будуць толькі нарастаць”, — дадаў палітык.

21 сакавіка Следчы камітэт паведаміў, што працягвае ідэнтыфікаваць і прыцягваць да адказнасці “ўдзельнікаў вулічных акцый за мяжой”.

“Рэалізуецца комплекс следчых дзеянняў і працэсуальных мерапрыемстваў па крымінальнай справе ў дачыненні да ўдзельнікаў антыбеларускіх замежных акцый і іх арганізатараў, праведзеных [у дзень “прэзідэнцкіх выбараў”] 26 студзеня бягучага года”, — адзначыў СК.

“Па месцах рэгістрацый і на аб’ектах рэальнай уласнасці дэананімізаванага экстрэмісцкага актыву праведзеныя ператрусы. Устанаўліваецца маёмасць і нерухомасць, на якія накладаецца арышт для наступнага забеспячэння кампенсацыі нанесенай дзяржаве шкоды. У рамках расследавання ўсе ўдзельнікі вулічных дзеянняў за мяжой, а гэта каля 400 чалавек, прызнаныя падазраванымі па крымінальнай справе”, — гаворыцца ў заяве ведамства.

СК паведаміў, што мае інфармацыю пра “планы правядзення чарговых замежных “сходак”, прымеркаваных да так званага “Дня Волі” (арфаграфія захаваная. — “Пазірк”.).

“Праваахоўнікамі будуць прааналізаваныя звесткі аб патэнцыйных і фактычных удзельніках гэтых мерапрыемстваў з мэтай ідэнтыфікацыі іх асоб і далейшага прыцягнення да крымінальнай адказнасці, у тым ліку з выкарыстаннем механізму спецыяльнай вытворчасці”, — пагражае СК.

25 сакавіка дэмакратычна настроеная частка насельніцтва Беларусі святкуе Дзень Волі — гадавіну абвяшчэння Беларускай Народнай Рэспублікі (БНР) у 1918 годзе.

У Беларусі гэтая дата афіцыйна не адзначаецца. Пасля прэзідэнцкіх выбараў 2020 года любыя спробы публічна адзначыць Дзень Волі заканчаюцца затрыманнямі і наступнымі судамі, як мінімум паводле адміністрацыйных абвінавачанняў. Гістарычныя падзеі, звязаныя з БНР, паслядоўна дэманізуюцца дзяржпрапагандай. Нацыянальныя сімвалы названыя “калабарацыянісцкімі”, “нацысцкімі” і фактычна абвешчаныя па-за законам. Значэнне БНР для беларускай дзяржаўнасці лічыцца перабольшаным, а сама рэспубліка пазіцыянуецца як “марыянеткавае” ўтварэнне, створанае пад германскім пратэктаратам у завяршальнай фазе Першай сусветнай вайны.

Акцыі за мяжою да Дня Волі будуць адбывацца з 20 па 30 сакавіка. Узяць у іх удзел беларусаў заклікала дэмлідар Святлана Ціханоўская 21 сакавіка.

На 25 сакавіка Аляксандр Лукашэнка прызначыў сваю сёмую інаўгурацыю.

23 сакавіка прысвечанае Дню Волі шэсце адбылося ў Варшаве.