Еўрапарламент прызнаў парушэннем суверэнітэту краін ЕС пераслед беларусаў у гэтых дзяржавах з боку рэжыму Лукашэнкі
3 красавіка, Позірк. Еўрапейскі парламент (ЕП) на пасяджэнні 3 красавіка прыняў рэзалюцыю “Непасрэдная рызыка далейшых рэпрэсій з боку рэжыму Лукашэнкі ў Беларусі — пагрозы з боку Следчага камітэта”.
Дакумент падтрымала 535 дэпутатаў ЕП, супраць выступіла 19, устрымалася — 55.
У каментарыі “Позірку” намеснік кіраўніцы Аб’яднанага пераходнага кабінета (АПК), кіраўнік Народнага антыкрызіснага ўпраўлення (НАУ) Павел Латушка адзначыў, што прыняцце рэзалюцыі пасля адпаведнага звароту кіраўніка НАУ ініцыяваў еўрапарламентарый ад Польшчы Міхал Кабоска, намеснік старшыні дэлегацыі ЕП па сувязях з Беларуссю.
У тэксце рэзалюцыі, паводле інфармацыі Латушкі, адзначаецца, што ЕП “разглядае пераслед грамадзян Беларусі за іх мірную дэмакратычную дзейнасць за мяжой, як прамое парушэнне тэрытарыяльнага суверэнітэту дзяржаў — членаў ЕС”, а таксама “заклікае да агульнаеўрапейскай прававой падтрымкі і абароны беларусаў у выгнанні”, у тым ліку тых, хто не мае магчымасці абнавіць дакументы, што сведчаць асобу, і зазнаюць экстэрытарыяльны пераслед.
Еўрапарламент таксама “заклікае Міжнародны крымінальны суд паскорыць разбіральніцтва па злачынствах супраць чалавечнасці, здзейсненых рэжымам Лукашэнкі”.
Акрамя таго, у дакуменце ўтрымліваецца заклік увесці “дадатковыя санкцыі, аналагічныя тым, што прымяняюцца да Расіі, у прыватнасці супраць службовых асоб, адказных за транснацыянальныя рэпрэсіі”.
ЕП таксама настойвае на неабходнасці ўзмацнення палітычнай, фінансавай і тэхнічнай падтрымкі незалежных СМІ, праваабаронцаў і грамадзянскіх ініцыятыў.
“Я ўдзячны дэпутатам Еўрапейскага парламента і асабіста дэпутату Міхалу Кабоску за прынцыповую пазіцыю і канкрэтнае дзеянне ў адказ на новыя рэпрэсіі рэжыму Лукашэнкі. Гэта пасланне дыктатару: злачынствы супраць беларусаў за мяжой не застануцца беспакаранымі. Неабходна ўзмацняць ціск, пашыраць санкцыі і дамагацца канкрэтных дзеянняў, каб спыніць тэрор супраць беларусаў як унутры Беларусі, так і па-за яе межамі”, — заявіў Латушка.
Пра тое, што ЕП рыхтуе паводле паскоранай працэдуры адмысловую рэзалюцыю ў сувязі з пагрозамі Следчага камітэта (СК) Беларусі на адрас удзельнікаў святкавання Дня Волі па-за межамі краіны, стала вядома 28 сакавіка.
21 сакавіка СК паведаміў, што працягвае ідэнтыфікаваць і прыцягваць да адказнасці “удзельнікаў вулічных акцый за мяжой”.
“Рэалізуецца комплекс следчых дзеянняў і працэсуальных мерапрыемстваў па крымінальнай справе ў дачыненні да ўдзельнікаў антыбеларускіх замежных акцый і іх арганізатараў, праведзеных [у дзень “прэзідэнцкіх выбараў”] 26 студзеня гэтага года”, — адзначыў СК.
“Па месцах рэгістрацый і на аб’ектах рэальнай уласнасці дэананімізаванага экстрэмісцкага актыву праведзеныя вобшукі. Высвятляецца маёмасць і нерухомасць, на якія накладаецца арышт для наступнага забеспячэння кампенсацыі прычыненай дзяржаве шкоды. У рамках расследавання ўсе ўдзельнікі вулічных дзеянняў за мяжой, а гэта каля 400 чалавек, прызнаныя падазраванымі па крымінальнай справе”, — гаварылася ў заяве ведамства.
СК паведаміў, што мае інфармацыю пра “планы па правядзенні чарговых замежных “сходак”, прымеркаваных да так званага “Дня волі” (арфаграфія захаваная. — “Позірк”.).
“Праваахоўнікамі будуць прааналізаваныя звесткі пра патэнцыйных і фактычных удзельнікаў гэтых мерапрыемстваў з мэтай ідэнтыфікацыі іх асоб і далейшага прыцягнення да крымінальнай адказнасці, у тым ліку з выкарыстаннем механізму спецыяльнай вытворчасці”, — пагражаў СК.