Мінск 02:48

Пуцін даручыў кіраўніку “Раснафты” Сечыну “адрэгуляваць” экспартныя цэны для Беларусі — Лукашэнка

4 красавіка, Позірк. Прэзідэнт Расіі Уладзімір Пуцін даручыў генеральнаму дырэктару кампаніі “Раснафта” Ігару Сечыну “адрэгуляваць” экспартныя цэны для Беларусі, паведаміў Аляксандр Лукашэнка 4 красавіка на сустрэчы з прэм’ер-міністрам Аляксандрам Турчыным.

Гаворачы пра свой візіт у Маскву 13–15 сакавіка, Лукашэнка заявіў, што Пуцін падтрымаў яго на перамовах “па ўсіх пытаннях”, “пачынаючы з фінансавых і заканчваючы цэнаўтварэннем на нафту і гэтак далей”.

“Гаворка ішла пра тое, каб мы адрэгулявалі цану на пастаўкі расійскай нафты, каб нашы прадпрыемствы працавалі. Не патрэбна там шалёная рэнтабельнасць. 7–8% і гэтак далей”, — цытуе прамоўцу яго прэс-служба.

Ён таксама анансаваў візіт Турчына ў Расію. Паводле яго слоў, пытанні, якія неабходна вырашыць у РФ прэм’еру, “вядомыя”.

“Падчас візіту трэба папрасіць у ўрада Расіі, каб гэтыя пытанні былі вырашаны канчаткова, бо там былі даручэнні ўраду Расіі зрабіць тое, тое, тое, каб яны былі вырашаныя”, — адзначыў Лукашэнка.

“І шэраг стратэгічных пытанняў, па якіх прымалася рашэнне [падчас майго візіту], — дадаў ён. — Трэба паглядзець, як мы выконваем. Калі ёсць нейкія недахопы з нашага або з расійскага боку, каб гэта было адзначана. Нешта мы разгледзім на Вышэйшым дзяржсавеце Саюзнай дзяржавы, калі гэта патрэбна. Але лепш гэта вырашыць на ўзроўні двух урадаў”.

Паведамляецца, што Турчын праінфармаваў Лукашэнку аб тэлефоннай размове з расійскім прэм’ер-міністрам Міхаілам Мішусціным. “Дзякуй расійскім калегам, дастаткова прадстаўнічая каманда з боку расійскага ўрада будзе [на маючых адбыцца перамовах]. Мы павінны абмеркаваць усе ключавыя пытанні ўзаемаадносін, напрамкі. Думаю, што разуменне ёсць. Дзякуй, што падтрымалі нашу каманду перамоўшчыкаў, усе глыбока пагружаныя, тэмы зразумелыя, вядомыя”, — сказаў Турчын.

14 сакавіка Лукашэнка выступіў у Савеце Федэрацыі РФ. Сярод іншага ён заявіў: “Што вы трымаецеся за нафту, газ? У вас жа няма куды іх дзяваць. Гляджу, так учапіліся. Давайце дамаўляцца. У нас два мадэрнізаваныя па апошнім слове тэхнікі нафтаперапрацоўчыя заводы [у Наваполацку і Мазыры]. Могуць 25 млн тон перапрацаваць. Добрыя заводы. Еўропа ў свой час купляла”.

Адзначалася, што ў сваім выступе Лукашэнка “зрабіў акцэнт на неабходнасці стварэння спрыяльных і роўных умоў гаспадарання для суб’ектаў абедзвюх краін”, бо Беларусь “са свайго боку заўсёды адгукаецца і прыходзіць на дапамогу, калі гэта патрабуецца расійскаму боку”. Так было ў тым ліку “апошнім часам”, калі ў Расіі “ўзнікала неабходнасць у дадатковых пастаўках дызельнага паліва, бензіну, электраэнэргіі”.

Паводле слоў Лукашэнкі, беларускія нафтаперапрацоўчыя прадпрыемствы “не могуць працаваць у страту”. “Не трэба 30% для пашыранай вытворчасці. Няхай гэта будзе 7–8% рэнтабельнасці. Але трэба захаваць гэтыя заводы. Гэта для нас трэба”, — сказаў ён.

Раней паведамлялася, што на сустрэчы ў Маскве 20 лютага намеснікі прэм’ер-міністра Беларусі і Расіі Віктар Каранкевіч і Аляксандр Новак абмеркавалі “працу па паглыбленні інтэграцыі ў рамках Саюзнай дзяржавы, узаемадзеянне ў гандлёва-эканамічнай і энергетычнай сферы, ход працы над фарміраваннем аб’яднанага рынку нафты і газу”.

У той жа дзень у Маскве адбыліся сустрэчы намесніка міністра замежных спраў Беларусі Паўла Уцюпіна з намеснікам кіраўніка МЗС РФ Міхаілам Галузіным, намеснікам міністра эканамічнага развіцця Уладзімірам Ільічавым і старшынёй Еўразійскай эканамічнай камісіі Бакытжанам Сагінтаевым. B  b

На першай з іх, як адзначалася, гаворка ішла, у тым ліку, пра “ўзаемадзеянне ў знешнегандлёвай сферы”, на другой — пра мытна-тарыфнае і нетарыфнае рэгуляванне ў ЕАЭС.

На працягу апошніх гадоў улады Беларусі і РФ рэгулярна заяўляюць пра вядзенне працы па фарміраванні аб’яднанага рынку нафты і газу. Аналагічны праект прапануецца рэалізаваць на прасторы Еўразійскага эканамічнага саюза.

Падзяліцца: