За год Украіна прадухіліла продаж 7,7 тыс. найменняў кніг, выдадзеных у Беларусі, РФ і пад акупацыяй

5 красавіка, Позірк. З красавіка 2024 года прадухілены продаж на гандлёвых пляцоўках Prom.ua ды ROZETKA.UA 7,7 тыс. найменняў друкаванай прадукцыі, выдадзенай у Беларусі, Расіі і на акупаваных тэрыторыях, вынікае з паведамлення Дзяржаўнага камітэта тэлебачання і радыёвяшчання Украіны.

Якая доля кніг з Беларусі, не ўдакладняецца.

“У сакавіку [2025 года] па выніках маніторынгу былі выяўленыя факты незаконнага размяшчэння ўкраінскімі інтэрнэт-крамамі “НОВА КНИГА” і Your book на маркетплэйсе Prom.ua і на створаных на платформе Prom.ua вэбсайтах камерцыйных прапаноў па продажы 169 найменняў выдавецкай прадукцыі, звязанай з Расійскай Федэрацыяй і Рэспублікай Беларусь”, — адзначае Дзяржкамтэлерадыё.

“Акрамя таго, былі выяўленыя факты супрацьпраўнага размяшчэння інтэрнэт-крамамі DinaShop, Fairy tale і Wbooks на маркетплейсе ROZETKA.UA больш як 200 найменняў выдавецкай прадукцыі паходжаннем з дзяржавы-агрэсара і Рэспублікі Беларусь”, — гаворыцца ў паведамленні.

Усе гандлёвыя прапановы былі выдаленыя, прадаўцы папярэджаныя пра “прадугледжаную законам адказнасць за ажыццяўленне неправамернай дзейнасці ў выдавецкай справе”.

У чэрвені 2023 года Уладзімір Зяленскі падпісаў закон “Аб унясенні змяненняў у некаторыя законы Украіны аб вызначэнні абмежаванняў на ўвоз і распаўсюд выдавецкай прадукцыі, якая тычыцца дзяржавы-агрэсара, Рэспублікі Беларусь, часова акупаванай тэрыторыі Украіны”. Яго палажэнні былі імплементаваныя ў арт. 281 закона “Аб выдавецкай справе”, на які спасылаецца Дзяржкамтэлерадыё.

Сярод іншага рэгуляторны орган вядзе “маніторынг выдавецкай сферы дзяржавы-агрэсара, Рэспублікі Беларусь і часова акупаваных тэрыторый Украіны” на прадмет выпуску “антыўкраінскай выдавецкай прадукцыі”. Звесткі пра такую прадукцыю заносяцца ў “пералік кніжных выданняў, змест якіх скіраваны на ліквідацыю незалежнасці Украіны, прапаганду гвалту, распальванне міжэтнічнай, расавай, рэлігійнай варожасці, здзяйсненне тэрарыстычных актаў, замах на правы і свабоды чалавека”.

На 3 красавіка 2025 года ў гэтым спісе фігуруе 570 выданняў, але, паводле праведзенага “Позіркам“ аналізу, аніводнага з Беларусі. У Расіі выдадзена 550, Украіне — 7, у “асобных раёнах Данецкай і Луганскай абласцей” (АРДЛА) і на “часова акупаванай тэрыторыі Аўтаномнай Рэспублікі Крым” — па 4, сумесна ў РФ і Украіне — 2, у Італіі, Францыі і на “часова акупаванай тэрыторыі Данецкай вобласці” — па 1.

Афіцыйны Мінск падтрымлівае Маскву ў развязанай ёю 24 лютага 2022 года поўнамаштабнай вайне супраць Украіны.