За суткі ў Беларусі ліквідавана дзесяць лясных пажараў

14 красавіка, Позірк. Дзесяць лясных пажараў (агульная плошча — больш за 13 гектараў) і 57 пажараў травы і кустоў (9,5 га) ліквідавалі ў Беларусі за апошнія суткі, паведамляе Міністэрства па надзвычайных сітуацыях.

З іх дзевяць было ў Брэсцкай вобласці, адзін — у Гомельскай. Восем пажараў патушылі сіламі Міністэрства лясной гаспадаркі, два — МНС і Мінлясгаса.

Паводле інфармацыі Мінлясгаса на 14 красавіка, у сувязі з пажарнай небяспекай абмежаванне на наведванне лясоў дзейнічае ў Ляхавіцкім і Баранавіцкім раёнах (Брэсцкая вобласць).

Абмежаванне азначае, што ў лясы нельга заязджаць на аўтамабілі і разводзіць там вогнішчы.

За парушэнне пажарнай бяспекі прадугледжана адказнасць паводле арт. 15.29 КаАП (штраф для фізічных асоб — да 25 базавых велічынь, або 1.050 рублёў).

У 2024 годзе амаль 60% усіх лясных пажараў выяўлена з дапамогай аўтаматычнай сістэмы відэаназірання, у лясах працуе 400 камер, паведаміў намеснік начальніка ўпраўлення лясной гаспадаркі Мінлясгаса Віктар Звяртоўскі на прэс-канферэнцыі 19 сакавіка.

Паводле яго слоў, сярэдняя плошча ляснога пажару летась склала 0,7 га.