На чыгуначным вакзале Мінска ўсталяваная першая ў Беларусі аптэка-робат
22 красавіка, Позірк. На цокальным паверсе чыгуначнага вакзала ў Мінску ўсталяваная першая ў Беларусі аптэка-робат, паведамляе прэс-служба Міністэрства аховы здароўя.
Аўтаматызаваная аптэка ўяўляе сабой закрыты куб, унутры якога знаходзяцца стэлажы з лекавымі сродкамі. Пакупніку дастаткова ўвесці назву прэпарата на сэнсарным экране, прыкласці пашпарт і аплаціць. Адзначаецца, што сканаванне пашпарта неабходнае для пацвярджэння, што пакупніку споўнілася 14 гадоў. Робат выбірае патрэбны прэпарат і перадае яго ў акенца выдачы.
У асартыменце робата-аптэкі каля 300 безрэцэптурных лекавых сродкаў айчыннай вытворчасці, для захоўвання якіх падтрымліваецца аптымальная тэмпература. Адзначаецца, што ў перспектыве аптэчныя робаты змогуць выдаваць прэпараты па электронных рэцэптах.
Аўтаматызаваная аптэка створана гомельскім прадпрыемствам Eday Robotics, якое спецыялізуецца на комплекснай аўтаматызацыі розных вытворчасцяў.
