Распачатая спецвытворчасць у дачыненні да рэстаратара Кірыла Борахава

25 красавіка, Позірк. Следчы камітэт 25 красавіка распачаў спецыяльную вытворчасць у дачыненні да брэсцкага рэстаратара Кірыла Борахава.

Паводле інфармацыі ведамства, Борахаў абвінавачваецца паводле ч. 2 ст. 243 КК (ухіленне ад выплаты падаткаў, збораў).

Мужчыну прапанавана прыйсці па адрасе, дзе месціцца ўпраўленне СК па Мінску.

У Брэсце Борахаў быў заснавальнікам шэрагу вядомых устаноў — караоке-клуба “Сола”, грыль-бара “Карова”, піцэрыі “Марыа”, прасторы “Свет”. У Мінску ён адкрыў кавярню Easy Soup.

Цяпер Борахаў, мяркуючы з інфармацыі на яго старонцы ў “Фэйсбуку”, займаецца выпускам безалкагольных напояў у Польшчы.

Працэдура спецвытворчасці ў Беларусі прымянялася адносна 147 чалавек. Гэта вытворчасць па крымінальнай справе ў дачыненні да абвінавачанага, які знаходзіцца па-за межамі Беларусі і ўхіляецца ад яўкі ў орган, што вядзе крымінальны працэс. Магчымая па 34 складах злачынстваў, якія пераважна адносяцца да катэгорыі цяжкіх і асабліва цяжкіх. Сярод іншага гэта акт тэрарызму, генацыд, наёмніцтва, здрада дзяржаве, дыверсія, стварэнне экстрэмісцкага фарміравання або ўдзел у ім, масавыя беспарадкі, заклікі да санкцый ды інш.