Менеджмент БЧ пакляўся не дапускаць “карупцыйных праяў”
27 красавіка, Позірк. Клятву аб “недапушчальнасці карупцыйных праяў” прынеслі 26 красавіка “ва ўрачыстай абстаноўцы” менеджэры аб’яднання “Беларуская чыгунка”, паведамляе прэс-служба арганізацыі.
Адзначаецца, што гэта адбылося ў “адзіны дзень” прынясення гэтай клятвы, праведзены “ў фармаце відэаканферэнцыі”.
У мерапрыемстве прынялі ўдзел начальнік БЧ Валерый Вярэніч, яго намеснікі, кіраўнікі структурных падраздзяленняў аб’яднання і іншых яго аддзяленняў.
Падчас цырымоніі, “звяртаючыся да прысутных”, Вярэніч назваў карупцыю “сур’ёзнай і надзённай праблемай” не толькі для БЧ, але і “ў цэлым для краіны”. “Яна падрывае асновы дзяржавы і наносіць сур’ёзны рэпутацыйны ўрон Беларускай чыгунцы, стварае негатыўнае меркаванне ў грамадстве і кідае цень на шматтысячны калектыў добрасумленных і адказных работнікаў”, — сказаў ён.
Паводле сцвярджэння кіраўніка БЧ, прынесеная клятва “стане яшчэ адной дадатковай мерай стымулявання работнікаў да законапаслухмяных паводзін, накіраваных на папярэджанне, выяўленне, спыненне правапарушэнняў, якія могуць ствараць умовы для карупцыйных праяў”.
“Перакананы, што прынясенне клятвы стане эфектыўным спосабам барацьбы з карупцыяй у рамках антыкарупцыйнай палітыкі, якая праводзіцца на Беларускай чыгунцы”, — падкрэсліў Вярэніч.
Паведамляецца, што ўдзельнікі мерапрыемства, азнаёміўшыся з тэкстам клятвы, паставілі пад ёй свае подпісы.
СМІ рэгулярна паведамляюць пра злоўжыванні на БЧ.
14 кастрычніка 2024 года тэлеграм-канал нефармальнай “Супольнасці чыгуначнікаў Беларусі” паведаміў аб затрыманні трох менеджараў службы перавозак БЧ. Пад варту былі ўзятыя начальнік службы перавозак БЧ Віталь Панюшэнка; яго намеснік — начальнік Цэнтра ўпраўлення перавозкамі (ЦУП) Фёдар Шулянкоў; першы намеснік начальніка ЦУП — кіраўнік аператыўна-распарадчага аддзела Аляксандр Іваноў. Паводле папярэдняй інфармацыі, у дачыненні да іх распачатая крымінальная справа паводле арт. 430 КК (атрыманне хабару).
15 жніўня стала вядома, што намеснік начальніка БЧ Сяргей Сізін звольнены за парушэнне пісьмовага абавязацельства, прадугледжанага заканадаўствам аб барацьбе з карупцыяй.
13 чэрвеня прэс-служба МУС паведаміла аб выкрыцці супрацоўнікамі ГУБАЗіК карупцыйнай схемы, якую “стварыў і курыраваў адзін з кіраўнікоў БЧ”. Сцвярджалася, што падчас ператрусаў у загарадным доме аднаго з фігурантаў было знойдзена больш за 3 млн долараў.
Следчым камітэтам адкрыта крымінальная вытворчасць паводле ч. 3 арт. 430 КК (атрыманне хабару ў асабліва буйным памеры).
3 чэрвеня “Супольнасць чыгуначнікаў Беларусі” са спасылкай на свае крыніцы паведамляла пра затрыманне за карупцыю першага намесніка начальніка БЧ Пятра Дулуба, а ў канцы ліпеня — Сізіна і галоўнага інжынера БЧ Сяргея Навадворскага.
14 чэрвеня на нарадзе з урадам Аляксандр Лукашэнка пацвердзіў, што за карупцыйныя злачынствы пад следствам знаходзіцца сярод іншых Дулуб, які таксама быў зняты з пасады пастановай урада.
12 жніўня Лукашэнка прызначыў Вярэніча начальнікам БЧ. На гэтую пасаду ён пераведзены з пасады намесніка міністра транспарту і камунікацый. Прычыны звальнення папярэдняга кіраўніка Уладзіміра Марозава не названыя.