На экс-палітзняволеную Паліну Шарэнда-Панасюк завялі яшчэ дзве крымінальныя справы

29 красавіка, Позірк. У дачыненні да былой палітзняволенай Паліны Шарэнда-Панасюк распачатыя яшчэ дзве крымінальныя справы, паведамляе яе муж Андрэй Шарэнда на сваёй старонцы ў “Фэйсбуку”.

Паводле яго слоў, абвінавачванні прад’яўленыя паводле арт. 361 (заклікі да мер абмежавальнага характару (санкцый), іншых дзеянняў, накіраваных на прычыненне шкоды нацыянальнай бяспецы) і 422 (ухіленне ад прэвентыўнага нагляду) Крымінальнага кодэкса.

Дапытаныя сваякі экс-палітзняволенай, адзначыў мужчына.

Шарэнда-Панасюк знаходзілася ў няволі з 3 студзеня 2021 года. Праз шэсць месяцаў пасля затрымання суд Маскоўскага раёна Брэста прыгаварыў яе да 2 гадоў пазбаўлення волі ў калоніі агульнага рэжыму паводле артыкулаў 364 (гвалт у дачыненні да супрацоўніка органаў унутраных спраў), 369 (абраза прадстаўніка ўлады) і 368 (абраза прэзідэнта) КК.

У красавіку 2022 года, кастрычніку 2023-га і кастрычніку 2024-га палітзняволеную прызналі вінаватай паводле арт. 411 КК (злоснае непадпарадкаванне патрабаванням адміністрацыі выпраўленчай установы, якая выконвае пакаранне ў выглядзе пазбаўлення волі). Дадаткова яна атрымала тры гады і адзін дзень пазбаўлення волі.

Пра вызваленне Шарэнда-Панасюк стала вядома 1 лютага 2025 года. 6 лютага ў выніку эвакуацыі з Беларусі жанчына прыехала ў Вільнюс.