У рацэ Котра на мяжы Беларусі і Літвы знойдзеныя тры целы

30 красавіка, Позірк. Тры целы знайшлі супрацоўнікі Службы аховы дзяржаўнай мяжы Літвы ўдзень 30 красавіка ля вёскі Мусцейка (Варанскі раён Алітускага павета, які мяжуе са Шчучынскім і Свіслацкім раёнамі Гродзенскай вобласці), паведамляе сайт alytusplius.lt.

Паводле інфармацыі медыя, целы знайшлі ў памежнай рэчцы Котра. Паводле папярэдніх звестак, адно цела знаходзілася на літоўскай тэрыторыі, два — на беларускай.

Інфармацыю пра загінулых перадалі супрацоўнікам паліцыі, якія прыбылі на месца выяўлення цел.

Пасля з’яўлення інфармацыі ў літоўскіх СМІ, Дзяржпагранкамітэт Беларусі заявіў, што целы ў Котры знайшлі гродзенскія пагранічнікі, пра што, як сцвярджаецца, быў “праінфармаваны літоўскі бок”.

“На месца выяўлення трупаў для высвятлення ўсіх абставін здарэння выкліканая следча-аператыўная група”, — паведамляе ведамства.

Міграцыйны крызіс на мяжы Беларусі і краін Еўрасаюза цягнецца з вясны 2021 года. Улады суседніх еўрапейскіх дзяржаў лічаць яго “гібрыднай атакай”, арганізаванай рэжымамі ў Мінску і Маскве.

Аляксандр Лукашэнка неаднаразова заяўляў, што беларускія пагранічнікі не будуць спыняць нелегальных мігрантаў, якія накіроўваюцца ў Еўрасаюз праз Беларусь, таму што іх туды “паклікалі”.

Ад пачатку года суседнія краіны ЕС прадухілілі больш за 8 тыс. спробаў мігрантаў нелегальна трапіць з тэрыторыі Беларусі, сведчыць праведзены “Позіркам“ аналіз даных іх памежных службаў. Літва за гэты час спыніла 558 такіх спробаў.